Myanmar móngdàn taq Karen kàru svng zìdang dvhàng lvm Catholic Fr taq kèní røtnò we shvngkà

Myanmar móngdàn Pathein svrado gørwang taq bvnlì wawe Fr tiqgø taqkèní Asúyaq paqzí zùng taq Karen kàru svng shvngøt lvm dvtú bøa. Fr. Mahn Eikhin shøn we taq "vdèò dvcì kàru svng vpø shvringìnø roqgvr shìra:ámì" wanø shøn bøa. Àngnø Karen móng dvcìrì dvpat dvcì bvnlì shølshú tiqpè gø ínø July 13 ni taq kàru shvngøt svrarìò zupùng taq shøn tvnùng bøa we íe.

Fr. Eikhlein taq kèní "Karen kàru shvngøt dvtú ràwe shvrànø Ayeyarwady gørwang vdòng taq mvdøng shvngøt dvtú ràe pàwálvm wani we rvgaq taq vlwe vsvng mvlúngka nø Karen dvcìrì íwe ratnø vsúyaq paqzí zùng taq vdèpvn kàru gø shvngøt lvm gvzà vchyake" wanø dvkám bøa we íe.

July 18 ni taq wá vduwe Karen kàru nvng singnø Training Workshop dvpat Ayeyarwady gørwang taq vlwe Karen Buddhist, Baptist nvng Catholic shvngømré Committee rì taqkèní tùbumshì lvm vra shìbøì. We lòng zóng taq zóngcèrì 52 gø svng shvngøt nø cvnshì lvm íwe taq Sgaw Karen mvdò taq kèní 27 gø nvng Pwo Karen mvdò taq kèní 25 gø cvnshì lvm tvnùngvtnàwe íe.

Myanmar móngdàn Constitution rìgup dvrá taq gø we dø vdè dvcìrì nvng singwe kàru tóng laqyàrì cvnshì lúnlvm dvzvŕ we dvrá vl we íe. "Vzàng kaq wedø vdè dvcìcèrìò kàru tóng laqyàrì paqzí zùngrì taq cvnshì mvlúnò werat dvcìcèrì vdèò kàru tóng laqyàrì taq gvzà vnøn lúngì".

Fr. Eikhlein nø Pathein gørwang vdòng shvngømré Mission taqøgø wedø íwe dvcì bvnlì taq gvzà dvzaq dvkángshì we íe.

#rvanews