Myitkyina Catholic Sasvnaò Covid rvtø dvnungshì we nvng Mama Nu Tawngò bvnlì dvgvng.

Myitkyina Catholic Sasvnaò Covid rvtø dvnungshì we nvng Mama Nu Tawngò bvnlì dvgvng.

(9.8.2021)RVA Rvwang

Myitkyina Catholic Sasvna ku Covid 19 zønlì lvjanglvm center rì svng vle a:mi we lvban 1 ni taq poq bøā nø cì lvjáng pvngshì bøì we íe. " Vsvng gønshaq nø ring we írvt shí mà-dùrì we Vsvngrì shì we Vsvng luqmvnshì rvt myitkyina Catholic Sasvna kèní Vsvng gønshaq svng mà-pálshì rvt Vkvt dø covid center poq nø wáshì we dang íe wanø Sr.Rosa Nu Tawng taqkèní shønò we íe.

Covid zønlì lvjanglvm nvng singdø myitkyina Sasvna shiqshan comition Vgopè Fr. Joseph La Nu nvng tiqdø hpung øp shvrúngshúrì nvng dvgá mvdòrì vrashi nø poq bøā we íē. myitkyina Sasvna kèní zilvngrérì nø chutchvng we taq vp núngshì nø svrāwøntì, cì svramaqri vbá nø shvngbe (30) gø dvngtèí dvnungshì e wanø shálún shìe. myitkyina Covid zønlì lvjàng we taq (2) pvn vwáshaq íe. Covid zā nø oxsigen (90) lvpvng vjà rì kaq svng Aung nan taq vl we St. Columban lvngare Pōdā zong lap taq gvlshì nø svrāwønri, svramarìí vto nø lvjangà we shá lún shìe. We shvrà taq zā vsvngrì (30) gø' dvpvt dvgøshaq íe wanø shønò we shálún shìe.

Yóga gvzà mvsòng we Covid Positive ínø vdè chøm taq dvtdvt vllvm shvrà màdá vsvngrì dvpvt Cidāpru covid lvjangà we center taq vto nø lvjangà we svng shálún shìe. Cidāpru center taq zā Vsvngrì (20) gø' dvpvt dvgøāshaq íwe svng gø shálún shìe. St. Columban nvng Cidāpru covid center, dvgá dø gø rvm nø wàlvm dvgøshì we svng shálún shìe.

Cì ròng rì kaq dì mvlúnò we zā vsvngrì nø Sr. Nu Tawng taqkèní chøm vrvm kaq svng dì nø lvjangà we svng shálún shìe.

Sr. Nu Tawngí Sasvna kèní poq bøā we " mvligintaì " cì ròng bvnlì angkang ku (2015) nøng kèní vkvt høqshaq dvnungò we svng shálún shìe.

Àng vl we mvligintaì cì ròng taqgø dvmādōrì nvng vzøm nø zā vsvngrì kaq svng gun lvjvngò we shálún shìe. We lòng cì ròng taq Gvmsùng màdá we Vsvngrì, mvzvn rvt dvshá vhømò we Vsvngrì, gvzà dvshá we Vsvngrì téwa dì we svng shálún shìe.

2021 nøng vshøm shvlá taq myitkyina myoq taqø Sandaqbyaq vsvngrì kaq svng mà-tù mà-rè lvm rvt panciqtùshì røtnimshì dvbvng yv'ngkèní Vsvng mvmèí shá bøā nø Sister kaq vlu zíshì we Vsvng vl rvt zā vsvngrì kaq dvpø màdá dvbvngshi bøí nigø yanila nø dvbvngshi we mà-vl, cì dvpø gvzà vháng rvt dvpø màdá lvjangà ma-lún rvt nønt mvshøm rà íe wanø Sister taqkèní shønòe. Ínigø gvzà yvk we vdòng taq dvsha mvhøt vhømò vsvngrì kaq svng nø vlún dvngtè lvjangà nø dvbvngshìe wàe.

Yà rvtø taq nø Covid zønlì yóga dvjáng vkøn nø Vshé we irvt cì ròng kaq tuqdaq weò covid vl mà-vl walòng vzàng zit we írvt sit dvpø mà-tøshaq Covid Test Kid dvpø wa lúshì we dang, dvpø màdá wàwe Ínigø cì dvpø vháng rvt cì dvpø wa lúshì we dang nvng bvtut màbá we íni nø dvpø màdá lvjangà we dang shønòe.

Sister rì taqkèní mvring kaq svng gø tvrí shì nø Covid zønlì mvgàm lúnlvm paqzizì we tīndánri gø wàbøā we shálún shìe. Myitkyina Sasvna kèní poq pvngbøā we Covid zønlì mvgàm nø lvjang we mvdò taq Sister Nu Tawng taqkèní zā vsvngrì kaq dvtú we bvnlì svng wàò we íe