Nv̀mlat àngní svma shv̀nshér vsv̀ng gǿní ò shv̀shér dvrè rì sv̀ng St. Peter noqngø̀m tø̀ngnø taq rvda lv́m íwe

Nv̀mlat àngní svma shv̀nshér vsv̀ng gǿní ò shv̀shér dvrè rì sv̀ng St. Peter noqngø̀m tø̀ngnø taq rvda lv́m íwe

(10) boq waboq mònggv̀n chø̀m dø̀ngku rìò lìpùngmè sv̀ng wà bǿà we Vatican taq shvngø̀mré mèò nv̀mlat boq mvshǿl shøp lv́m shv̀nshér vsv̀ng àngní svma (2) gǿ íwe Luigi nv̀ng Maria Beltrame Quattrocchi níò shv̀nshér dvrè rì ni íe. Ya lìpùng mè taq kø̀mngǿm ráì we gvsa shaqrérì shvngbe taqkèní gø yalòng sv̀ng dvgùng shvring we wà bǿà.

We àngní svma nø (45) nǿng døp dø̀ngku lvpat ku Rome taq vl yv̀ngì we gø íe. Àngchø̀m mè nø paqzí vdè tiqgǿ gø íyv̀ngì. Àng nø Catholic shvngø̀mré mè taq bv̀nlì dvzømshì yv̀ngì we ínø Red Cross wawe shiqshàn dap nv̀ng gø bv̀nlì wà yv̀gnì we íe. Àngnø 1965 nǿng taq shì yv̀ngì.

Àngchø̀mpè nø dvrá gvsa tiqgǿ íyv̀ngì. Nv̀mbat (2) mònggv̀n mvjàn zø̀m bǿì mèpvng Italy móngdàn sv̀ng vrang lúnlv́m dvpat mà nvr nvr bv̀nlì wá dvzaqshì yv̀ngì wegø íe. Àngnø àngchø̀mmè ò vzàng kaqni 1951 nǿng taq lvpat bé yv̀ngì we íe. Àngní svma nø Catholic shvngø̀mré taq sanbyaq gv́l vpǿ we lvpat taq cúnshì yv̀ngì nø kámnøt tvrà taq zǿm shvngángshì yv̀ngì we gø íe.

Àngní svmà ò nvmbat (4) gǿ wa gǿ àngcèpè gø shvngø̀mré vdòng ràwe dang vrv̀m taq dvzømshú shvlá tiqgø ku vl yv̀ngì we íe. Àngcè nv̀mlat V pong pè íwe Benedine nø shvrúngshú tiqgǿ íyv̀ngì nø nongtøm gø íwe Tvrábit gø shvrúng shú tiqgø íyv̀ngì. Àngní svma taq àngcè lvngà shvdang (3) gǿ mvtaq àngcè zvmì (2) gǿ gø shvzat yv̀ngà.

Àngcèmè ní taqkèní tiqgǿ nø Benedine Sister mvdò taq apnúngshì yv̀ngì we ínø̀ tiqgǿ nø shvngǿmré vsv̀ng tiqgǿ ku gvray kámnøt tvrà taq dvzaq dvkángshì yv̀ngì we gø íe.

We àngní svma sv̀ng shv̀nshér vsv̀ngrì wanø̀ Svrabín koqkámpè St. John Paul (II) taqkèní AD 2001 nǿng October21 ni taq vrìng yv̀ngà. We shv̀nshér vsv̀ng àngní svma ò bóy àngni svng àngní dø̀ngku shvzøng shì yv̀ngì we àngni taq wàlv́m dvkám shaq íwe gø íe. Àngní svma nø AD 1905 nǿng taq dø̀ngku shvzøng shì yv̀ngì we gø íe.

Àngní svma nø àngní ò dø̀ngku lvpat taq jø̀ng jǿng ni sanbyaq wá vpǿwe Catholic shvngø̀mré ò lvpat taq dvzaq dvkángshì yv̀ngì we mvtaq àngcèrì sv̀ng gø kámnøt tvrà taq zǿm shvngángshì lúnwe tvrà shvlá kèní shvngøt vjøná ráà we mvtaq dvká shvngø̀mré dø̀ngku vsv̀ngrì kaq gø paqzí laqyà shvlárì dvtanā ráà werat àngní svma sv̀ng yadø shv̀nshér vsv̀ngrì wanø̀ mvsat yv̀ngà wegø íe.