Nvmbat 2 mònggvn mvjàn taq lvpat cøm yàngì vsvngrì kaq dvdamnø vjúrøtā we àngni

Nvmbat 2 mònggvn mvjàn taq lvpat cøm yàngì vsvngrì kaq dvdamnø vjúrøtā we àngni

January 27 ni nø Nvmbat 2 mònggvn mvjàn taq lvpat cøm yàngì vsvngrì kaq dvdamnø vjúrøtā we àngni wanø mvsvt shìweí mèpvng kaq wedø vsvng dvcì køp dvdatnò we mvjànrì svng vgám lúnlvm wawe tvnù mangárì kèní mònggvn svng vtànò we angni gø íe. Yani svng mònggvn rvpdoq UN lìpùng íwe 2005 nøng November 1 ni taq kèní mvsvt shì bøì we íe.

Mònggvn rvpdoq UN shvngkà taq kèní tvnùngò we taq yadø vsvng dvcìrì datwe høqshaq shvtnò nø svmi taq wvrbøà we màná dømrø mvshøl yalòngnø paqzí zùngrì mvtaq vsvng màngpòng rìdvhø dømshálvm tvnùng ràe wanø dvdut bøà we íe. Yaniò lìpùng svng New York myoq taq vlwe mònggvn rvpdoq àngké róng nvng mònggvn móngdàn vrvm UN róngrì taq wáshì we gø íe.

2006 nøngò lìpùng gvbà taqnø vsvng gorø 2200 gø mvngushì we ínø shvngkà tìyørì taqkèní gø mònggvn svng dvshvng lúnbøà we íe. Svngpvn vko vkáng roqgvr we dvrá taqgø shvt vhøm yàngà we Jú dvcìrì 3 wvĺ tiq wál nvng dvgá dvcìcèrì nvng dvcì rvwing we bvnlì rìsvng kadvgvp gø vgámnø dvdamā lúnlvm dang dvbánø tvnùngò we íe.

Vránø wervtø taq Nazi cèldvp kèní dvki vrè we vhøm yàngà vsvngrì tung rung vsvngrì nvng lvpat cøm yàngì vsvngrì kaq vpø shvring we angni gø íe. 2007 nøng January 26 ni taq UN kèní kàciq ratshì bøì we taq vsvng rìkaq dvki vrè nø shvtwe nvng singnø nvngòn ziwe mvdòrì kaq vgám lvm wanø kàciq gvlshì bøì we íe.

Gvray shvnshvŕ kàru vdòng búngángmì lèga 20:12-13 taq gø Namaq Gvray Yehowaí èzínøng we móngdàn taq namaq lvpat yv̄ng dø cúnshì lúnlv́m dvpvt nvpè nvmè maq svng vpǿ ràe. j 13 Vsvng shvt mvdaq wanø yánglún shìe.