Pōgolátì mvdòo shølshú angshvr rvzvng bøā we dang

"Pōgolátì mvdòo shølshú angshvr rvzvng bøā we dang"

Pogolátì mvdò nø mongzøngce Shvngømrérì nvng Gvray kaq vpnóng shìwe dvzømshúrì taq kèní poqbøā we mvdò tiqlòng íe. Yalòng mvdò svng (1943) nøng taq giāra lúpiesh kèní zilvngré tiqmvzøq nvng mòngkan mvjan bøn we rvtø taq pvngshì yvngì mvdò tiqlòng íe. Vkvt rvzvng bøā we shølshúpè shøn wetaq nvmlat pvngyàngàpèo zaqshøpri téwa dønglvm zvndvttut dvzaq dvgvngshi lvm íe wanø Margaret karram íshøn bøā. Àng vzvngkaq Maria Voce íshølò we íe. Mvdò svng nvmlat pvngò we shølshúpè mà-vl a: mì mèpvng vnípè wapè gø íe.   

 Margaret Karram taqkèní mvdò svng shøllvm shølshú vgo rvzvng bøā we mvdvmø pvlace tvrà taq gø dvbù nøntshøm weí nònggwøn kūngà lùshì lúnò we dang, yabaq nvng vnibaq shølshú vgo ku rvzvng lúnò rvt Gvray kaq oqā wàwe shá lúnshìe.  mvdò svng shøllvm shølshú Vgò nø vní baqhøq wà wáshìlv'm Nvmlat dvrá taq vgvlshaq íwe svng gø shálúnshìe. Vkvt dø rvzvng bøālòng svng Svrabin Koqkvm taqkèní gø dvrá Shang mvsat bøāwe íe.  Angnø lvpat (58) ínø, dvcì dvgúng nø Ārvt dvcì íe. Angnø isarè móngdvn taq shøqyvngà. Àng taq kèní kvmnønt tvrà màbóng we mvdò rì nvng mvmè vtoq-vtip vzømvzvp we bvnlíri tiqdvtvng rvm nø wàbøā we svng gø shálún shìe.

 Vchut nøng vdòng taq mvdò svng pvngā nø dì lú;ngì we angò lvpat zaqshøp mvshølrì svng angjøng ni vjú vl dø wálunlvm dvpvt  vlømshingè wàe. Cunshì we Gvray Mongkà taqkèní nvmlat vrvngshì we døngku ílvm gvzà dvzaq dvgvngshi lvm íe. Yalòng nø nøngmaq shvngbeò mvnggá ínø vrvm vrá lòng svng lúnlvmrvt íē.    

mvdòo àngwa lìpong tvyø svng nø online kèní wàbøā nø, mònggang døngtvng kèní kimvng shvngbè (359) gø lúmbøì. Yalòng mvdò nø mònggang móngdvn (182) móngdvn kaq svng vsher a: mì nø , mvdò svng gòng we lvngàré, svmaré shvngbè nø (2) wvn dvngtè vlē. We mvdòo mvdøng Vchvk we cvndvgøm lvm nø, mònggang taq angní angnvm nønt nvng vrvm vrá nø Mongzøl  lvm lòng svng háng nø cunshì lúnlvm rvt íe, wàe.