Pentecost (shànshér we Pvlàcè lāshì daqì) bóy nī Noqngøm Missa rvtø Vsvng mvgv'mí vtù vrè rvt Vsvng (50) gø mvdvm shì bø'ì we shvngkà.

  Pentecost (shànshér we Pvlàcè lāshì daqì) bóy nī Noqngøm Missa rvtø Vsvng mvgv'mí vtù vrè rvt Vsvng (50) gø mvdvm shì bø'ì we shvngkà.

 Vlē a:mi we nár nī Pentecost ( shànshér we Pvlàcè lāshì daqì ) bóy àngnī taq Naijiria móngdàn tìni tut taq vl we Catholic Noqngøm chøm tiqlòng kaq àng bøng chvk màsháshi svnvt làng vsvng mvgv'm tiqpè taqkèní vtù vrè weí wap bø'à wànø shvngkà tálúnshìe.

    
  Owo myoq taq vl we St.francis Xavier Noqngøm zong taqø vjú røtshì nø mvngushì we rvzvngce mvdò kaq svng vtù vrè svnvt lang Vsvng mvgv'm tiqpè rvt Vsvng 50 gø' mvdvm shì bø'ì nø Vsvng mvmè nø Cì rúng svng tuqbø'i wanø svrawøn tiqpè taqkèní shvdøngò nø shøn bø'à.

 
Wè myoqò myoqdo  wunji pè taqkèní gø Nønt yòr vhømò nø ngv'mshì we chøm Vsvng rì nvng tiqdø  Nøntyòr we kàru  tiqgøm svng gø dvkang we àngò v-toq v-tip we online mvr mvdvm taqø vru weí dvkang bø'à nø dvshà mvhø't vhøm bø'ārì dvpvt  dvrá rvpra dø vtoshì lúnlvm dang svng gø shøn bøā we íē.

       
   
Svrabín koqkvm Francis ínø wèlòng svng tálún bø'à chvng dvkang kàru tiqgøm svng dvkang bø'à dv'ngí mà-vl bø'ì we mvrà màdá shvngømré rvzvngcerì, cvmrérì nvng Svmarérì dvpvt vjúrøt dvbvng bøā.

Wè mvdvmø banchvk lòng svng jip we rvtø vdòng dvshà mvhø't vhø'm bøā rì dvpvt  tiqnønt tiqmvyung  shvráshì weí vjúrøt dvbvng lvm rvt nvng shànshér Pvlàcè taqkèní Nønt shvløm we jèjú kūngà shaqrì vtōshì lúnlvm rvt vjúrøt dvbvngì, wànø vnv'n weí vrá røtnímshìe. 

 Naijiria móngdàn nø Catholic rvzvngcerì nvng rvzvngcerì shvngbe kaq svng mvnggá tiqlòng dø gvl nø vtù vrè we vhømò we móngdàn tiqlòng gø ínø, yà nøngrì vdòng taqø vtù vrè lòng nø tiqnvmshá vháng lóngì wanø shønò we svng shálún shìe.