Philippines dvcì vsvng tiqgø'Vaticanò yé bønlúngì we

Philippines dvcì vsvng tiqgø'Vaticanò yé bønlúngì we

Philippines shvwi vjøng íwe Philippines dvcì vsvng tiqgø'nø Vatican taqø bvnlì rì we Switzerland vcún vsòngshú yé mvdò taq vbá bø'ì.

Àng bøng nø Sebastian Esai Eco Eviota wā tø shìe. Àng lvpat nø (23) nøng wa íe. Àng nø Philippines dvci kèní Vatican yé bøn lúngì we vní pè wàpè íē. Àng kaq Philippines móngdànò tìnī tut Davao taq shøq yangà nø (2009) nøng kèní Switzerland móngdàn kaq vsershì yangì.

Vaticanò yé wáshì lvm rvt (2) shvlá wa dindan cvnshì yangì. Angpè nø Diomedes Eviota ínø Surigao kèní íe. Àng me nø Editha Eco ínø (2000) nøng taq mà-vl bø'ì. Angpè nø dvrá vji ínø (2022) nøng taq mà-vlà yangà. Rvmnvng rì ínø Baste wa tøò we  ‘Sebastian’ nø Switzerland kaq vsérshì bø'ì mèpvng Sasvna mvdòò shò vngvtshì we bvnlìrì taq lvngshò nøntni shvlúmshì lúnìe.

Vkvtdø bønlúnlvm rvt nø ( January 17,2022 ) nī taq Du pè taqkèní go bø'à we íe. 

Vaticanò yé tiqgø' bøn lvm rvt (1) lvngaré í ràe. (2) Switzerland mongzøngce í ràe. (3) Catholic rvzvngce í ràe. (4) døngku mvgòng we vsvng í ràe. (5) lvpat (19) nøng kèní (30) vdòng vl we í ràe. Góng hàng 5 bē 5 letmaq í ràe. (6) Cìldvp bvnlìrì we mvkøm mvdup gø vl ràe.(7) Paqzí dang taq nø Paqzí bòeq tiqlòng lòng mø-í nìnø deployment tiqlòng lòng lún Vsvng i ràe.

Vaticanò yé rìò Gō rø nø (135) gø vl nø, Vatican yé rìò àng lvpat detdá:n nø (516) nøng í bø'ì. Vaticanò yé rì nø Switzerland Cìldvpmò àng lvngpvmg taqwā vlē.

Sebastian nø Vaticanò yé ku bvnlì wà we vní pè wà pè Philippines dvci gø íe. Àng vzàng wàwe Vincent Lüthi bvnlì wà yangì. Àng nø October shvlá (2020) høq bvnlì wà yangì. Àngmaqò bvnlì nø Vatican nvng sing we chøm rì svng gø, svrabín koqkvmpèò chøm íwe Castel Gandolfo gø Svrabín Koqkvmpèò vcún vsòngshú ku gø bvnlì rí ràe. (516) nøng dv'ngte bvnlì rí lúngì we Vatican Cìldvp nø mònggvn taq cv'm vtv'ng Cìldvp ínø, lvpat yv'nggung Cìldvp tiqlòng gø íe.