Pvlàcè dang vhøm nø mvngushìwe lìpùng

Pvlàcè dang vhøm nø mvngushìwe lìpùng

25.2.2023 lìpùngmè ò vrìng kàru

Asia dan dvtang Catholic shvngø̀mré mè ò lìpùngmè 2 ni wani dvpvt vjúrøt kà vgo íwe “ Adsumus Sancte Spiritus” walòng taqkèní poqpv́ngshì bǿì wegø íe. Yalòng lìpùng mè taq Asia dan taq vlwe shvngø̀mré vsv̀ngrì ò shún kàrì shvngbe svng Gvray àng gálòng taqkèní vtán lúnlv́m dvpvt shv̀nshér pvlàcè Gvray kaq tvle nø vjúrøt lìpùng kèní pv́ngshì bǿì wegø íe. We vjúrøt kà vgo lòng nø Latin dvcì kaku íwe “Pvlàcè Gvray, nøngmaq vpè Gvray shvnvngø nøngmaq nvng tiqdø vle” wawe kà vgo taq kèní pv́ngshì bǿì wegø íe.

We lìpùngmè dvpvt dvbang shìwe bv̀nlì àngkàng Sr. Nathalie Becquart XMCJ taqkèní gø yadø Gvray tvrà taq tiqdø zaqle dìì wenø shòlaq kùngà tiqlòng gø íwe dang vtànbǿà we íe. Shvngø̀mré wawe tvrà taqkèní Gvray àngkaq svng tvpníshì lv́m dvpvt zaqlè dìì we nøngmaq shvngbe nø Gvray àngò kàsvng tálv́m dvpvt tvpní shàì we íe. We tvrà svng cvn dvgøm we vsvng nø Gvray àngò shóngshì we tvrà svng cv́n dvgømwe vsv̀ngrì ni íe wanøgø Svrabín koqkámpè Francis taqkèní dvkám wegø íe. Tiqdø tiq zaqlè tvrà svng diwe vsv̀ngrì nø jejú gømpaq lúnwe tvrà íwe dang Sr. Nathalie taqkèní gø vrá vtàn bǿàwe íe.

Yesu Kristuí dvtan ráà we pvlàcè chutcháng tvrà kaqsvng yv̀:ngì dvgvp welòng nø nøngmaq shvngbe kaq svng ègoì wegø íe.

We lìpùngmè taq kø̀mngǿm ráì we gvsarì shvngbe ò mvngushì lv́m kà vgorì taq nv̀mlat 1 dvtàng taq mvpv́ng dvtàng ( Taking the floor) wawe taq we lìpùngmè svng kø̀mngǿmwe vsv̀gn tiqgǿ vrv̀m ò mvkrǿm mvdøprì dvtit tvle we nvng wedangrì svng dvtøp nø rvtø lushì we, 2 tut taq “tiqdá vsv̀ng dvpvt shvrà tóngāwe” wawe kà vgo taqkèní vhømnø dvmv̀nwe wáshì bǿì wegø íe. 3 tut wa tut taqnø “ròráshaqí vrang lv́m” wawe kà vgo ínø tuqrawe shvngø̀mrémè ò bv̀nlì mvtú àngshí àngwvtrì dang dvdamshì we, dvtøpwe nvng tasv̀ng tàle mvngushì nø vra dvtǿ we dangrì wáshì wegø íe. Yadangrì shvngbe nø “Shv̀nshér Pvlàcè Gvrayí nøngmaq kaqsvng tvrà èshølìe” wawe kà vgo svng tvnùng wegø íe.

Lìpùngmè taq mvdø̀ng vràshì we mvpv́ng tutrì nø shvngø̀mré vdòng taq vzø̀ngwe kà vgorì, mà bóngwe tvràrì sv̀ng shvlácè, tøp tøpwa vrashì lún emá? Asia dan vdòng taq vlìwe shvngø̀mré vsv̀ngrì ò mvkrǿm mvdøprì mǿíni àngmaqò dvshà mvhøtwe tvràrì vlwe dangrì dø íwe dang 5 dang svng October shvlá taq wàlv́m íwe Mònggv̀n Synod Catholic shvngø̀mré lìpùngmè dvpvt dvtøpnø̀ vrashì wegø íe.

Yani dvpvt rvtø shølwe nø India móngdàn Deli Svrado Àngké vgopè íwe Anil Joseph Thomas Coutol, Commission mvlúm Ms. Christina Kheng nvng Asia dang Svrado Àngké mvdò (FABC Synod Task Force) mvlúm Ms. Momoko Nishimura ma íbǿì.

Dèni ò lìpùngmè kaqsv̀ng Pakistan móngdàn kèní Svrado Joseph Coutts í shølnø vjúrøt Missa wáshì weí mòngzø̀ldø dvdáng lún bǿà wegø íe. We vjúrøt Missa lìpùng taq pvlàcè nònggwòn lushì lv́m dvpat “angní lvngà vrùng nø vlv̄n we nø, “Tvrà rāmø ang nø nílvngà svng kà dvmv̀n nø, shànshér kàru rì èpǿnāshì dvgvp, ngàní nvrø̀m nø vkatdv̀ng wàshì we mø̀í ma? Wae” (Luka 24:32) wawe jømciq kèní nònggwònzi nø dvkám we nvng dvshvt bǿà wegø íe.