RVA nvng FABC-OSC yvng vgo washi pe, Father Ambroise shivmmi we shvngka

RVA shvngka dvpo vgo washi pe, Father Raymond Ambroise shivmmi we shvngka

Asia Svrado Mvdoo shvngka dvshvng dvp nvng Radio Veritas Asia (RVA) shvngka dvp yvng vgo washi yvngnga pe, Fr Raymond Ambroise nx July 7, 2020 niq taq India Mongdan yvng shivmmi we svng shalun shie.

Father Ambroise nx, RVA shvngka dvshvng dvp yvng gx dvgx nxng dvngte vgo washi we bvnli wao nx, India Mong, Secundarabad wama keni dvsha mvhxt iwe cvmreri (100) jvng svng gx yvngo pe ie. Ang shiwe rvtx, lvpat 75 hxqo we pe gx ie. 

Shvngxmre vdong yvng, Gvray Dvbu shvngka nvng chutchvng we bvnli yvng, shongnxnt, mvreza nxnt taqkeni dvzxmshu washi nx gvza dvzaqshi pe gx ie. Gvray bvnli washi we rvtx vrvm yvng, nxnt vtxp shiwe, nxnt vlishi we tvra kadvgvp gx mvshxn nx dvzxmshu washi pe gx ie.

Vra nx, Father Ambroise nx, Radio Veritas Asia Shvngka Dvshvng dvp (21) dvp vl we yvng, vde Rawang Dvci Shvngka svng gx vtoo nx dvnuo pe gx ie.

Cardinal Charles Bo i gx, “Father Ambroise nx, Gvray bvnli dvzxmshu washi we tvra yvng, nxnt vlishi, nxnt vtxp we mv-vl nx, dvbu we nxnt taqkeni ang lvpat lvngdxm niqhxq vpnong shipe ie” wa nx shvgonoe.