Shøngran yøpnvng rì mè gèyaqni, døngmvn we shøngran yøpnvng nø nà svng vnøn dvzvr lvm møí.  

Shøngran yøpnvng rì mè gèyaqni, døngmvn we shøngran yøpnvng nø nà svng vnøn dvzvr lvm møí.

   Zunbóy àngni taq Svrabín koqkámpè Francis taq kèní shvngømré vsvngrì kaq shønran yøpnvngrì gvlshì lvm dvtú nø nvngòn ziwe íe.

Kàngpè Yesu nvng vtoqshì lvm rvtø èzí ò.

    Shvnshér we lvbán 5 ni taq Yesu wurgáng svng dvdam shàì nø àng nvng vtoqshì lvm wàì. À:ngò dvshà mvhøt we tvrà rì taq kèní vtoq vtip shàì. Yadø yaklvm shìwvtrì, zønlì dvjángrì dvhø taq kámnøt svng shvngáng shàì wanø Svrabín koqkámpè Francis taq kèní nvnggùn ziwe íe.

    Yadø Yesu zun lú:ngì we rvtø lvngcha vdòng taq nøt mvsøn mòngzøl lvm tvrà rì la shàì nø nøt dat lvm tvra rì svng yilshì lvm vchyake wanø yanøng ò Zunbóy lvbán taq dvkám we gø íe.  Weratnø dvbù necì nvng shøngran yøpnvng rì svng røt shàì. Nøngmaq vsvngrì dvhø taq rvyù rvyóngwe tvra rì svng vná lvm dvzaq shàì.

  Àngdè tiqgø ò mvrà rì dvpat dvzvŕ Peter nø kadø nøt líng shì nø necì vyø yà:ngì walòng svng dvdam shàì. Tiqdá vsvngrì kaq nøt vtøp zá dvzvŕ we kàrì mvshøn lvm vyá shàì. Yani la mònggvn taq bønwe mvjàn rì dang Svrabín koqkámpè Francis taq kèní dvtøp nø dvtú lú:ngà. Téwa Ukraine móngdàn nvng Russia móngdàn rìvtaq bøn we mvjàn ratnø vsvngrì 4.7 sé sèn rvzé vsvngrì mvjàn yilshì rà bøì we gø íe.

   Kapà Yesu gø Egypt móng svng wedøni yilshì vdu yà:ngì we nvng tasvng rvwìngwe nvng mvwámshì we laqyà rì nø zønlì tiqlòng dø vkøn ráì we dang dvtú vtnà we íe. Ngànshà pèí nø kadvgvp gø dvløt gvzàmwe íratnø vyá shàì. Ngànshà pèí nø dvløt gvzàmwe wà lú:ngòe. Mvra dòng svng ègo vtnìe. Ngashàpè wawe nø jøng jøng ni vl we íe. Àngmaq taq mashvla we dangrì nvng dànzøng we íe. Ínìgø vsvngrì kaq vtù vrè we wáshì long kvt kènínø welòng svng gvsat rà longe. Pàwá lvm wani tiqkvt kvt àngmaq yvng shvla we àngyø rì gø vlsháò we rat íe. Mvyøn gømpaq vmnø màshvla dø øpshøl we yvngkèní mvjàn rì dvbung sháò we ínø we dang svng svdiq vyáshì ràwe dang shvdøm nø nvnggùn ziwe íe.

   Svrabín koqkámpè Francis dvtut shønwe taq svmaré rì taqgø gvzà nvnggùn káng we kù:ngà vle wanø dvtú vtnà. Svmaré tiqgø taq kèní àngmaq ò àngcèrì kaq shvlá vtang vcúng lú:nòe. À:ngmaq nø lvpat taq kadø cúnshì vdu we nvng kámnøt tvrà taq kadø shvdøng shvngángshì ràe walòng svng síngshá òe. Svrabín koqkámpè Francis nø mabóng we dvshà mvhøt lvm dang svng gø dvkám nø shvdøm we wà bøà. Covid zønli dvjáng vkøn we rvtø taq St. Peter noqngøm tø:mø kadø wá vdu bøì we dangrì svng dvkám bøà wegø íe.

   Svrabín koqkámpè taqkèní gvray nø shvlá vtang we íwe dang àng nvng tiqdø kadvgvp gø vlwe dang vtàn vtnà. Pàwálvm wani à:ngí wá mvlú:nò we bvnlì rì svng à:ngò kù:nga taqkèní jórlún dáng lúnò we ínø ya dangrì taq bashà rìò laqyà ku cvnwe la ínìnø shvngømré yalòng nø vcat vmwe gø bøn sháò we dang vtàn bøà.