Shvngømré taqkèní shvngøt dvtú lòngnø tvsvng roqgvr kélvm dvpat íe

Shvngømré taqkèní shvngøt dvtú lòngnø tvsvng roqgvr kélvm dvpat íe

Shvngømré taqkèní shvngøt dvtú we rìnø shvngømréò shølshú vgo rìí kámnøt wawe gálòng svng tvnùng we ínø shóngnøt vdòngø téwa vháng lúnwe íe. Pàwálvm wani shvngømré rìò bvnlì danggvp vrvm nø dvtut roqrim nø wá vdu longe. Wedang taq gø shóngnøt taqkèní døngman dø wárà longe.

Dvshá hoq vsvngrì nvng dvgùng shvngwe dangrì taq vdu vbóng dø vjúrì svng lá vshøp nø pvnmán we dang kaq roqgvr ràlong we íe. Rvcvngcè rìò lvpat taq vsvng tiqgø wawe nø dang vrvm taq vháng lúnwe svng vlò we íe. Svng pvn vtoq vtip we walòng taq gø tiq svng, tiqgø dvpat wa mø:í nø vsvng shvngbe kaq shøn mvyø we íe.

Wedø íratnø vsvng shvngbe nø tasvng vpø shvring kéì we taqkèní wa vsvng tiqgøò dvgùng svng dvhángā lún we íe. Shvngømré angké rúng taq kèní shvngøt dvtú we taq svngpvn vtoq vtip we dang, móng lvmang nvng wulaq bvnlìrì taq tiqdø vzøm nø wawe taq kèní wa mòngzøl lòng lúnshì we svng shvdøm we íe.

Svrabín koqkámpè Francis taq kèní shvdøm we taq yani la vkøn ráì we yóga zønlì ratnøshvngbe taq yaklvm shìwvtrì vhøm bøshà. Yadø íwe shìwvt taqkèní angdè tiqgø taq kèní wanø kadø gø chutcháng lúnshìlvm nø mv-vl long. Shvngbe vzømì we nvngòn kùngàrì taqkèní wa mvngàn lúnlúngìe wanø dvkám bøà we íe.

Yadang nvng singnø tvsvng vzømlvm nvng toniò dvrá svng roqgvr shìràwe ‘Laudato si’tvnùng kàru taq kèní shvngbe svng vrìng bøà we íe. Shvnvt mvzø nvng mòngzøl we dang Shvnvt mvzø taqkèní wulaq bvnlì wawe nvng téwa neuclear lanvk waò we bvnlì taq zángshì we pøgvmsùngrì nvng singnø gø Svrabín koqkámí sømsaq mòngzøl lvm dang nvng dvshá mvhoq vsvngrì dvpat tùbum dvbang shìlvm dvkám we íe.

Vrá nø vháng mvnshì we móngdànrì svng dvbangā we bvnlì taq kèní gø téwa mònggvn svng mòngzøl lòng lúnshì dvzvŕ longwe íe wanø shvdøm bøà. Cømsaq mòngzøl lvm dang nvng singwe paqzí dvkøm lvm Tasvng roqgvr kélvm nvng singwe paqzí rì tvsvng dvtit tvle kélvm gvzàni vchyak we íe. Angdèò chøm døngku vdòng taqkèní chøm vsvngrì dvhø kadø vrvm vrá ràwe dangrì shvngøt vjøn kélún lvm mvdøng vchyake.

Wedø tiq dvchá ni paqzí zùngrì, noqngøm chømrì, shvngkà daprì nvng shvngøt shú svrarì taqkèní gø shvla we dangrì svng wa shvngøt dvtú lvm dvkám bøà we íe. Wedø shvla we bvnlìrì taqkèní wa ni vrvm angdè lvpat taq cúnshì laqlúnì wanø Svrabín koqkámpè Francis taq kèní dvkám bøà we íe.