Shvngøt shú svra angni

Shvngøt shú svra angni

   Shvngøt shú svra tiqgø wawe nø cvm gø tegø mvwa shvngbe svng shá dvzit nø shvngøt dvtú we vsvng kaq vlò we íe. Angnø vsvng kaq shá dvzitwe mvtaq tasvng vpø sháshì ràwe, cvndøng dvrárì taqkèní vsvngrìò nøt mvsøn svng tánãò we íe.
We dø shvngøt shú svra rìò dvzaqshì we svng vpø shvring òwe taqkèní nøng vrvm shvngøt shú svra rìò angni wanø wáshì ráì we íe.
Yani nø shvngøt shú svra rìò angi íráì nø mònggvn taq paqzí shawe zìdang svng dvtøp lúnlvm dvpat manggá wáshì we gø íe.
Yani nø mònggvn taq shvngøt shú svra rìò angni wanø mvsat shaq íbøì we dø tiq dvchá angmaq nvng cvnshúrì dvhø taq tasvng vzøm lvm dvkám we angni gø íe.
Mònggvn shvngøt shú svra rìò angni svng wáshì we tvnù manggá nø cvmrérì nvng téá:mì rì dvhø taq kadø íwe dangrì rà vchyak we taq dvzaq shìnø cvnã we svng dvdam shá lvm dvpat íe.
Shvngøt shú svrarì taqkèní shá dvzit we shvngøt dvtú we taq téwa zìdang vháng lún lvm nvng àngmaqò lvpat svng gø síng sháã lvm dvpat gø íe.
1994 nøng October 5 ni taq nvmlat boq mònggvn shvngøt shú svra rìò angni svng wá pvngshì bøì we íe.
Ya 2020 nøng taq nø shvngøt shú svra rìò angni wawe kà vgo vdòng taq kadø íwe bvnchvtrì nvng mèpvng kaq kadø wa lvm svng dvtøp we kà vgo rì taqkèní wáshì we íe.
Wedø nø dènøngò lìpùng yaqnø mònggvn móngdàn vram taq vlwe shvngøt shú svra rìò jór nvngòn rì svng shvgùn shvrìng we nvng angmaqò yak we shìwvt angpvn pvn rì kaq svng gùn dvtøpã lvm lvngcha shvlá íráì we íe.
           Shvngøt shú svra rìtaq àngmaqò zùngmarì kaq shvngøt vjøn lvm nvng shóngnøt dvtan lvm døngjá vl we íe.
Ngàò bvnlì døngjá nø angmaq svng síng sháò nø zitnøt vl høq shvngøt vjøn lvm kámshì shaq íe.
Angmaqò bvnlì døngjá rìtaq
1. Zùngmàngrì angmaq lvpat svng gùng dvtøpã lvm
2. Mvkrøm mvdøprì taqkèní cvnshì nø vdu vbóngwe rìsvng lálvm
3. Dvsháza shóngnøt gvlshì pvm
4. Vchyak láwe
5. Dvtøp vjøn nòwe
Yadangrì taqkèní angmaq nø dvzaqshì we íe.
           Nøngmaq móngdànò móng lvmang svng yàngvtnì dvgvp gvzà nøt cvm lvm vle. Pàwálvm wani deni batò paqzí dang nø paqzí cvnwe svng mvdøng wáshì we mø:í nø sánbóy dvpat wa té vyuqshì we svng yáng lúnshìe. Wedø írat zùngmàngrì mvlúngka nø sánbóy onglvm dvpat wa dvdam shìráì nø paqzí cvnshì we taq vnøn mvnshì we svng yánglún shìe. Wedø íwe rat zùngmang rìtaq sánbóy ong bøwe ínìgø jøng jøng ni paqzí shawe vsvng yúm mvnshì ráì we íe.
Shvngøt shú svra wawe nø zùngmang rìò shølshú angkàngrì gø ínø àngmaqò shóngnøt dvsháza nøt kèní angmaq svng shvngøt vjøn lvm døngjárì lushì we íe.
Wedø írat móngdàn tiqlòngò døngjá svng mvpvng ríò we nø shvngøt shú svra rìtaq kèní pvngshìe wanø gø shønlún shì we íe.
Kamóng ka rvgaq vlwe shvngøt shú svrarì ínìgø angmaq nø vchyak we dang taq ripwe íe. Wedø íratnø angmaqò dvgùng svng vpø shvring we ku taqkèní mònggvn shvngøt shú svra rìò angni wanø yani svng mvsat shìbøì we íe.