"Svkoqdvlvn móngdàn taq lvpat àng nøng (163) nøng íráì we Noqngøm chøm svmií vkat we Shvngkà"

"Svkoqdvlvn móngdàn taq lvpat àng nøng (163) nøng íráì we Noqngøm chøm svmií vkat we Shvngkà"

Svkoqdvlvn móngdàn, Glasgow taq vlwe St. Simon Catholic Noqngøm chøm nø July (28) nī, Vsháng tut taq kèní svmií vkat bøì. Svmì shvmaqlvm rvt mídvt Vsvng (30) gø nø we shvrà svng tuq ráì. Mídvt mvdòrì tuq ráì rvtø Vsvng tiqgø chvng lún a:pmà.St. Simonò sømla hvng nø svmií vkat bøì. Íni gø Glasgow taq vlwe Poland dvcicèrì dvpvt gvzà vchvk we nønt vlømshi rà íwe Noqngøm chøm me nø tìn gvyaq a: mì. Yalòng nø svkoqdvlvnò myoqdō, Edinburgh Noqngøm chøm me taq vjúrøt shìwe Catholic shvrúngshú tiqpè svng vtù vrè we vl nø Vnī ni wani taq bøn lòng íwe íe. Svkoqdvlvn móngdànò shiqshan tvrà wunjíí vkat a:mì we Noqngøm chøm me rvt Catholic shvngømré rvzvngcerì dvpvt nønt yor we dang dvshvng bøā we íē.svkoqdvlvn móngdàn taq vlwe shvngømré rvzvngcerì dvpvt gvzà nønt yor lvm Vnī ni wani íwe dang, Nvmlat (1) lòng nø shvrúngshú tiqpè vjúrøt shì we taq vtù vrè vsvngí shvtbøā we dang, we mèpvng Poland dvcicèrìí gvzà vpø shvringò we st. Simon Noqngøm chøm me svmií vkat a:mì.

    Svkoqdvlvn móngdàn taq vlwe shvngømré rvzvngcerì nvng tiqdø nønt yor ngè wanø angò Twitter mvr taq vrū bøā we íē. Svrabin Koqkvm Francis nø Svkoqdvlvn móngdàn kaq svng gvzà màlékè November dvgvp dvbùshang Sasvna bvnlìrì rvt dì lvm dvgøshìe wanø Svkoqdvlvn móngdàn Catholic svrado àngké rúng kèní shønòe. Svrabin Koqkvm Francis nø Guqlaq dvmmvgaq kèní dvnungshì we (2020) Lvngchà vlíng vbò we dang ( COP26) v-toq v-tip we kūng svng dì lvm wáshìe. We lòng vrashi kūng nø November (1-12) høq Svkoqdvlvn myoqdō taq vto nø wàlvm ía:mì. Sasvna lvpat gun mvshøl taq yàlòng Noqngøm chøm me nø Glasgow myoq taq lvpat yvng vtvng vshøm lòng walòng íe wàe. Yalòng mvdvmø lvpat téwa vlé ráì we Noqngøm chøm me nī nø st. Unteru gvt Noqngøm chøm nvng móngdànò nvm svr lap taq vl we st.merry Noqngøm chøm me ni íe. yalòng Noqngøm chøm nø (1858) nøng kèní Ireland móngzøngce fr. Daniel Gallagher taqkèní poq yàngà. Shvrúngshúpè nø zaqle íwe David Livingstone kèní shvngøtā nø cì zong svng dì yàngì.

         Noqngøm chøm me nvmlat àng Bøng nø st.peter íe. Yalòng Noqngøm chøm me svng Vnī baq wa baq Mònggang mvzvn taq Poland dvci cilcèrì kèní vjúrøt shìlvm wàò yv'ngkèní lvngò nø Poland Noqngøm chøm me wanø Bøng zíshì lòng íe. Noqngøm rvtø taq gø Poland dvci svngpvn Kàru taqkèní wà Missa Kagvp nóng we svng gø wáshì we Zong íe. Noqngøm chøm me svng (2005) nvng (2008) taq àng shvr tiqkvt dvzøp yàngà. We nøng nø Noqngøm chøm me (150) nøng gøm we nøng gø íe.

    Svkoqdvlvn móngdànò mídvt mvdò nvng dvbvng we mvdò svng dvtá we nø Vsháng (Am 2:40) rvtø ínø mídvt Modo (6) nvng mídvt Vsvng (30) gø taqkèní shvtnò we dang, Noqngøm chøm vdòng Vsvng tiqgø svng chvng lún we dang, gwørgwør taq vl we Vsvng mvmè nø vcár yv'ng svng a:tshì lúnòe. We shvrà taq dvbvng mvdò nvng mídvt mvdòrìí wa shvmaqò nø shvngbe shvmaq v dv'ng bø kvt zvndvttut svmi vkat pvngshì longì we tvrarì gún dvtøp lvm ídaqe wàe.