Svràbín Koqkám pè Fransic í, Ukraine kaq zàvsvng tòlvm Modo dvbvng we shvngka.

Svràbín Koqkám pè Fransic í, Ukraine kaq zàvsvng tòlvm Modo dvbvng we shvngka.
 
Ukraine Móngdàn taq bønbø'ì we cìl mvján rvtnø dvshá mvhøt vhø'mò we Ukraine móngzøngcèrì nvng tiqdø vllìe wanø Svrabín Koqkám pèí Ukraine svng dìlvm íwe Cadinal Konrad Krajewski nvng tiqdø zàvsvng tòlvm Modo tiq chvng Lviv svng zíbøà we íe. Ukraine vsúyaq rì taq kèní gø mvjàn yilshìwe móngzøngcèrì (250000) gø' svng mòngzøl dø shvrà dvgø'ã we dang Svràbín Koqkám pèí shvmán shaq íwe modo svng vlū modo svng vto lún bø'à we íe.
             
Svràbín Koqkám pèò kinmvng kù vkvt dø modo svng dvle lúnshìwe nø té vtvng we bvnli íwe dang, Ang lvjøm gvza sùng nø vpø'vtvng we dvrè tiqpvn dvbvng we dang, pàrvt ímá wanìnø zàvsvng tòlvm Modo nø gønshaq shv lùtlvm dang taq dvzøm we dang, Svrabín Koqkám pèí nø dvbà tánna we cømsaq mòngzøl we dang svng lún dvzvr pè íe. We zàvsvng tòlvm modo nø zàvsvng dvpvt mvdøng vchvk we dø zàvsvng tòlvm mòdò svng zíwe nø Svràbín Koqkám pèí zàwe vsvngrì kaq mvkoq we shóngnøt dvtvn we íe. 'Ngã nàmaq nvng tiqdø vllìe. Nàmaq nvng tiqdø vzøm nø vllìe. Cil mvjàn rvt dvshà vhømò we Ukraine móngzøngcèrì dvpvt vjúrøt dvbv:ngìe' wàwe Ang lvjøm svng dvtvn we íe.
              
We zàvsvng tòlvm mòdò svng nàmaq í nàto lúnshì høq dvbvng we Cadinal svng gø gvzà oqà wàwe dang, vkvt dø vlū zíbø sha we Svràbín Koqkám pè Fransic svng gø gvzà oqà íe wanø shøn we íe. Ukraine Móngdànò bvnlì døngjá vlwe shaqré tiqgø' kèní gø vkvtdø íwe rvtø taq vkvt dø gøm paq lún shìwe nø gvza lvjøm vlwe írvt lviv taq vlwe mvjàn yilshìwe vsvngrì tiqni nvng tiqni luqmvn shìwe rvtø gø íe. We rvtnø Cadinal svng gø Svràbín Koqkám pè Fransic svng gø we gøm paq nvng Ukraine móngdan dvpvt vjúrøt dvbvng shàwe írvt gvza oqã wawe dang, kèní nøngmaq nvnggùn lún bø'shà we íe. Tø'n mèpvng nøngmaqò cvmrérì rìsvng vkvt dø cil mvjvn vhøm dvzvr mvkàm shìwe dang, shiqshvn mòngzøl we dø v'l dvzvr mvyø'e. Le shìwe mvjàn da:ngí Ukraine svng vkvtdø Cadinal tuqwe vní baq wabaq íe, wàe.