Svrabín koqkámpè Francisí døngmvn we tvrà nvng angnvm angchangrìò shóngnøt mvsøn kèní mònggvn svng vrang lvm wàì wanø móngdàn krinmvn gvsa rìkaq dvkám bøà we shvngkà

Svrabín koqkámpè Francisí døngmvn we tvrà nvng angnvm angchangrìò shóngnøt mvsøn kèní mònggvn svng vrang lvm wàì wanø móngdàn krinmvn gvsa rìkaq dvkám bøà we shvngkà

Svrabín koqkámpè taqkèní vle vmì we lvbán 5 ni taq Vatican móngdàn vdòng mvsat shìwe shvrà rìtaq mv-vl we krinmvn gvsa rìnvng vhøm nø mvngushì bøì. We yángø vbáwe móngdàn gvsarì nø Jordan, Kazakhstan, Zambia, Mauritania, Uzbekistan, Madagascar, Estonia, Rwanda, Denmark nvng India móngdàn rì íe.

Dèni høq shaq Vatican môngdàn nvng krinmvn gvsa gvl nø vtoq vtip we móngdànrì shvngbe 183 móngdàn vl we íe. Ya 2020 nøng vdòng taq nø Covid 19 yóga zønlì vkøn we írat tiq móngdàn nvng tiq móng vtoq vtip we dangrì taq gvzàni yakwe vhømshì bøì we mvtaq mònggvn taq dvki vrè werì nvng dvshà mvhøt lvm rìgø gvzà vkøn bøì.

Wulaq bvnlìrì nvr vdu we taq ám-aq lvm dang dvshà we, vsvngrì tiq rvgaq kèní tiq rvgaq svng yvmbvn bvn we rìgø gvzà luq ráì we ìe. Wewa mvtaq dèni bat lvngcha vlíng vposhì ráì we taqkèní gø toniò dvjáng angpvn pvn vkøn weí mvhøt lvm rì gvzàni vhøm mvnshì lúngì. Wedang nvng singnø vle vmì we March 27 ni taq wáshì bøì vjú røt lìpùng gvbà taqø gø Svrabín koqkámpè Francis taq kèní nøngmaq shvngbe nø shøchøm tiqlòng taq tiqrá zúnshàì nø zaqle dìì we vnvmchvngrì wa íshàe.

We tvrà taq yaklvm, mvhøt lvm rì angpvn pvn vhøm lúngìe. Wedø mvhøt lvmrì vkøn rawe rvtø rìtaq tasvng tubùm dvbangā kéì weí roqgvr kéràwe svng nvngòn ziwe mòngkà taqkèní shvdøm bøà we íe. Vatican móngdàn nø mònggvn móngdànrì vrvm dvpat mòngzøl we dang taq dvzaq dvkángshì we àngké róng shvrà tiqlòng gø íe.

Yadang taq mònggvn vsvngrìò svngpvn lúnkáng dvrárì, tóng laqyàrì, kámnøt tvràrì nvng vsvngrì dvhø tasvng roqgvr kélvm dvrárì taq shvdøng shvngáng shì ràwe svng dvkám bøà we íe. Svrabín koqkámpè taqkèní móngdàn vrvm kèní tuqráì we krinmvn gvsa rìnø angdè móng angdè rvgaq dvpat ràwe dangrì vrvm taq shvla dø wálún lvm dvpat vhøm nø mvngushì we nvng vrashì we dang rìtaq dvzaqshì lvm dvkám bøà we íe.

Pàwálvm wani mònggvn móngdàn vrvm rì taqkèní bøn dvzvŕ mvyø we dangrì taq màbóng nø vsháy we dang rìtaq shvngbe dvpat vdu vbóngdø dvrá vdòng taq kèní vzøm nø wá dvzaqshì lvm svng dvkám bøà we íe.

Add new comment

1 + 6 =