Svrabín koqkámpè Francis ò shiqshàn tvrà nvng singnø̀ Vatican shv̀ngkà dvp kèní dvtúwe

Svrabín koqkámpè Francis ò shiqshàn tvrà nvng singnø̀ Vatican shv̀ngkà dvp kèní dvtúwe
Svrabín koqkámpè Francis nø vle bǿì we lvbán (3) ni taq naqtú taqø vna bø̀nnø̀ cìróng rúng vdu bǿì we íe. Wervtnø̀ Vatican shv̀ngkà dvp kènígø Svrabín koqkámpè ò shagóng shiqshàn tvrà dvpvt nøt bùmwe shvngø̀mré vsv̀ngrì kaq ni vrv̀m shv̀ngkà vrìngā we wàò e.
Yanila vdòng taq Svrabín koqkámpè Francis ò shagóng shiqshàn tvrà nø shvlacè zø̀m lú:ngì nø shaq vhéshì tvrà taqgø shvlá lú:ngì nø ni vrv̀mò vjúrøt tvyø̀ rì svng gø àngwà dø wá lún bǿà we dang vrìngvtnà.
Cì svrawon rìò gùndvtøp kàru taq àngnø naqtú taq vna bø̀nwe rvt shaq vhéshì we dang taq yakwe vhǿ:m bǿà vkvtdø cì lvjángshì bǿì mèpvng nø we vna lòng zø̀m á:mìnø gvzà màléwe rvtø̀ taqni cìróng kèní lo shvlá lv́m íwe dang dvtú wegø íe. Yanila taq Svrabín koqkámpè Francis nø shvláwa yøp lún bǿà we mvtaq á:m-vq we dangtaq gø shvlácè á:m-vq lú:nò nø vjúrøt tvyø rì svng gø àngwà dø wálún bǿà wanø dvtú bǿà.
Yadø àng shagóng mvshiq mvshàn we rvtø̀ taq mònggv̀n døng taq vlwe shvngø̀mré vsv̀ngrì taqkèní nøt dvbumshì weí vjúrøt dvbangāwe kàshaqrì rvt zø̀m bǿì wesvng oqà wawe kà vtàn bǿà.
Zv̀ndvtut gø àngò shiqshv̀n tvrà, Sasvna bv̀nlì dang vrv̀m taq téwa dvzaqshì lúwe kùngà jejúrì vtoshì lúnlv́m dvpvt vjúrøt dvbangā lv́m gø røt nímshì we íe.