Svrabín koqkámpè Francis nø Japan móngdàn ò Gàmzø pè nvng vhøm nø Nuclear mv-vl we mònggvn ílvm dang dvmvn we.

Svrabín koqkámpè Francis nø Japan móngdàn ò Gàmzø pè nvng vhøm nø Nuclear mv-vl we mònggvn ílvm dang dvmvn we.

Svrabín koqkámpè Francis nø Japan móngdàn ò Gàmzø pè Fumio Kishida nvng Vatican taq vhøm nø dvmvn bøì we íe. Yadø vhøm nø dvmvnwe nø Vatican móngdàn nvng Japan móngdàn dvhø taq krønmvn gvsa tvrà ku vtoq vtip we (80) nøng gøm rvtø gø íe.

Japan móngdàn nø 1942 nøng kèní Vatican móngdàn nvng vtoq vtip shì ráì we nvmlat móngdàn gø íe. Ya Japan móngdàn ò Gàmzø pè Fumio Kishida nø Hiroshima kèní ínø Svrabín koqkámpè Francis kaqsvng we rvgaq kèní wurzú gømpaq nvng dvhøm vtnà wegø íe.

Svrabín koqkámpè Francis taq kèní gø cømsaq mòngzøl lvm gømla rì íwe zanlún svp nvng ka-ø cømla hang tiqlòng ku vrá shvring nø zúshì bøì.

Svrabín koqkámpè Francis nvng Japan gømzøpè nø Ukraine móngdàn taq bønwe mvjàn nvng singnø dvmvnwe nvng Nuclear mv-vl we mònggvn bøn lvm tvra svng we 2 móngdàn kèní dvdamshì we dang dvmvn bøì wegø íe.

Yadø vhøm nø dvmvn we nø 2019 nøng Svrabín koqkámpè Francis ò Hiroshima nvng Nagasaki 2 myu svng dinø wedø mà shvla we shvnat mvzø rì mònggvn taq vmáng lvm tvrà svng tóng dvzaqshì ràwe dang Svrabín koqkámpè Francis taq kèní dvtú shaq íwe svng shálún shìe.