Svrabín koqkámpè Francis taq kèní COP26 lìpùngmè mvdàm shvlawe dvlàrì gvlshì we nvng Hedi, Vietnam nvng Sisli móngdànrì dvpat vjú røt āwe.

Svrabín koqkámpè Francis taq kèní COP26 lìpùngmè mvdàm shvlawe dvlàrì gvlshì we nvng Hedi, Vietnam nvng Sisli móngdànrì dvpat vjú røt āwe.

  Svrabín koqkámpè Francis taq kèní Italy móngdàn Sicily taq bønwe vtì tøngnø móng vsvngrì í dvshà mvhøt lvm vhøm:ò we nvng vtù vrèwe mvdòrì móngdàn vdòng taq vkøn mvnshì we Hedi móng øpshúrì kaqsvng roqgvr lvm dvkám we íe.

     Vle vmì we lvbán ni St. Peter noqngøm tøm taq shvngømré rìnvng Svrabín koqkámpè Francis vhøm nø mvngushì we lìpùng taq Vietnam móngdàn vdòng bønwe vtì tøngnø móng vsvngrì 7000 gø dángte nø we shvrà kèní yelshì vdu vmì werat vjúrøt dvbangā ràwe dang dvtú we íe.

  Nøngmaq shvngbe ò vjúrøtwe kà shaqnø dvshà mvhøt lvm vhøm ò we vsvngrì tuqwe mvtaq we shvrarì taq tubùm dvbangā we vsvngrì kaq nvnggùn ziwe gø íe wae.

   Vle vmì we lvbán vdòng Italy móngdàn Sicily wamà nvng Vietnam móngdàn shvràrì taq tìtøng we í dvshà mvhøt lvm vhøm:ò vsvngrì nvng tiqdø íshàe wanø dvtú bøà we íe.

We yángø mvrù mè tiqlòng nvmsvr lvpsvng møt ráì weí vsvng yúm vtang 3 gø shì bøì wegø íe.Zvnvtut àngí dvtú we taq móng dvrøt shvrà taq vl vdu we Hedi dvcìrì dvpat gø

   Móngdàn vrvm kèní móng øpshúrì ígø we móng svng yángā nø dvbangā we bvnlì walvm nvng vjú røtā dvbang ràwe dang dvkám we íe. Wemóng taq gvmzøpè Jovenel Moise shat vhøm bøà mèpvng móng vsvngrì kaq vtù vrèwe mvdòrì gvzà bung lúng:ì we íe.

   Gvzà màlé we rvtø taqni gvray bvnlì wawe vsvngrì 17 gø svnggø àngmaqí tvpmò nø American dollars 17 sésení cháng dvzvŕò we gø bøn bøì we íe.

   Svrabín koqkámpè Francis í Glasgow taq wàò we COP26 wa tøshì we mònggvn lvngcha nvng singnø lìpùngmè svng gø dvtú we mòngkà shvlang vtnà we íe.

    We lìpùngmè taq mònggvn lvngcha vlíng vpo ráì we nvng rvgaq yachàng tiqni mvdàm tiqni vkvtshì ráì we svng dvcøp lúnlvm dvpat móng øpshúrì, shvngkà tìyø dvkangshúrì 30000 rvzé gø nø Scotland móng taq mvngushì bøì we íe.

Rvgaq yachàng ò rvyù rvyóng we kàshaq nvng dvshá mvhoq vsvngrì ò vkiqwe kàrì svng táā lúnlvm dvpat vjú røt dvzaq shàì. Yalòng nø mèpvmg mèyàrì dvpat shvlawe bvnlì tiqlòng íratnø Gvray jejú vdòng taq kèní jór nvnggùn laqtuq daq wanø Svrabín koqkámpè Francis í dvtú nø vjúrøt shvmvnā we íe.