Svrabín koqkámpè Francis taq kèní mòngàn dvsháza tùbum mvdò poqpvngò we shvngkà

Svrabín koqkámpè Francisí shvngømré rìkaq svng kámnøt, vløm nøt nvng shóngnøt rì taq kèní dèni la bønwe shagóng nvng pvlàcè dang vhømìwe bvnchvt rì taq tùbum dvbang shì lvm dvkám bøà. Vle á:mì lvbán 3 ni Svrabín koqkám kó taq kèní dvshvng bøà we taq Svrabín Francis taq kèní luka kàru taq yáng lún shì dø tiq dvchá vna zønlivkøn we ínìgø kàngpè yesu taq kèní dvban daqò nø muqlàng móngdàn dvpat chutcháng we dàng vlwe svng nvngòn ziwe shvngkà dvshvng bøà we íe. Vdu vpóng we nvng dvsháza shóngnøt taq kèní kámnøt svng téwa ngàng døng dvzvŕ we íe. Pope Francis shøn we taq "kám nøt, vløm nøt, dvsháza shóngnøt nvng shvnshvŕ pvlàcè taqkèní dvbana lúnwe mvtaq dvbana shú gø bøn dvzvŕ lún we íe" wae. "Yadø cvndøng tvrà rì taqkèní nøng maq shvngbe dvpat tvrà àngshvŕ gø etóngà daqìe". Àng dvtut shøn we taq"kám vløm nøt nvng dvbùshvng bvnlì vdòng taq vrám vráìwe taq kèní mòngàn svng svre dvkot we ngànshàrì svng gø dvshèr bøòe" wae. Vpè Gvray nø cáng dvchøpwe vsvngrì kaq dvbanaò we mvtaq nøng maq shangbe nøt cvm nøt yòlì we taq kèní gø chutcháng dèzár ìe. Pope Francis àng taq kèní tuq rawe lvbán vdòng taq yóga zønli, bvnchvtrì nvng sing nø vhøm mvngushì lvm vrìng-vtnà. Lebanon móngdan Beirut myoq taq dat chyang bo bøìwe nvng sing nø ngámshì we chøm vsvngrì dvpat gø dvsháza nvngòn ziwe vjú røt shvngkà dvshvng bøà we íe.