Svrabín koqkámpè Francis taqkèní dèni shvnshér we lvbán 4 ni taq tung rung we vsvng 12 gø svng hí shølā lvm íwe.

Svrabín koqkámpè Francis taqkèní dèni shvnshér we lvbán 4 ni taq tung rung we vsvng 12 gø svng hí shølā lvm íwe.

April 14  

      Svrabín koqkámpè Francis í dèni shvnshér we lvbán 4 ni taq wá vdu we hí shølā we lvmang svng Roma wamà Civitavecchia tung taq we tung rung vsvng 12 gø kaq hí shølā nø kàngpè Yesu ò làngdøm dørøm vmpà vmbóy  Missa vjúrøt t tìyø svng wàlvm íe. Svrabín koqkámpè Francis nø Svrabín koqkám bøn ráì  mèpvng 2013 nøng mèpvng kaq nø yadø híshølā we lvmàng svng tung vdòng rì nvng làngré rìò lutshì rà tung rì taq wa hí shølā ò nø wá shì ráì wegø íe.

     Yadø àngí wá pvng vtnà we vtóng svng dvtut shvngàng lvm dvpat kù:ngà vnøn we vsvngrì, dvshá mvhoq vsvngrì mvdàm kàngpè Yesu nø luqtvmwe shøngnøt gvlshìe walòng svng Svrabín koqkámpè Francis nø chvpdvp bvnlì taq kèní dvtanā we gø íe.

       Catholic shvngømré vdòng cvdøng dvrá taq vm aq vnvtshì we rvtø lvngcha svng gòng bøì we nø ya lvbán ta qlàngdøm lvbán íráì. Dèni shvnshér we lvbán 4 ni taq mònggvn móngdànrì vrvm taq vlwe Catholic shvrúng shú rì taqkèní Kàngpè Yesu í àng lvmboq rì 12 gø svng hí shølā yà:nga we àngni svng dvdamshì lúnlvm dvpat shvngømré vsvngrì kèní 12 gø kaq hí shølā  we tìyø lvmàng svng wà òwe íe.
 

       Nvpni lvbán 5 ni taq nø Catholic shvngømré vsvngrì mvdøng mvdaq ni vm aq vnvtshì ràwe àngni gø íe. Pàwálvm wani Yesu Kristu shìlòng svng kámshì vmwe àngni shvnshér we lvbán 5 ni ínø tuqrawe lvbán ni taqnø Yesu vrá zun longwe Zunbóy lvbán ni gø íe.