Svrabín Koqkvm Francis ínø ídv'ngte shvngbe svng angmè Mari kaq vpnóng tvle we dang angmè àngni taq dvkvm we 

Svrabín Koqkvm Francis ínø ídv'ngte shvngbe svng angmè Mari kaq vpnóng tvle we dang angmè àngni taq dvkvm we 

Nár nī nø mònggvn taq vl angmè rì kaq svng dvgùng zi we àngni wā mvsatnò nø wa bø'à. Svrabín Koqkvm Francis ígø Muqlang rvgaq taq vl shvngbe svng Vkangpè Yesuò angmè Mari kaq vpnóng nø tvle we dang may shvlá (14) nī vyá:ng vjúrøt Noqngøm rvtø wàlvm rvt St. Peter Noqngøm tøngnu tøm yv'ng kømngøm ráì we vjúrøt Mvdorì kaq svng dvkv'm bø'à. 

Angmè àngni svng móngdàn mvmè taqø wàòe. Angmè rì Shvngbe nøngmaq nvng tiqdø vl rì, mà-vl we íni gø Muqlang tuq bø'ì rì shóngnøntni oqā wà dvdvm laq rø':nì. Shvngbe svng Vkangpè Yesuò angmè Mari taqkèní vjúrøt tvle ngòe wàe.

Ukraine móngdàn nvng mvjvn dàm rvt sø'm vhø'mō nø yvklvm vhø'mō we mònggvn móngdàn rì dvpvt gø vnā we mà-vl lvm rvt dvbvng lvm dang Vmè Mari kaq vjúrøt dvbvng we dang, téwa nø vkvt mvzvn rvnaq we Isré nvng balasdaí dvhø taq bøn we mvjvn tiqdvshaqí nar lúnlvm rvt vjúrøtnò we dang, lvknak rì langweí mongzøl lvm lòng mà-vl we dvja, vlømshì lvm mà-vl we dvja rì svng cvt lúnlvm ràe wā dvkv'm bø'ì.

Svnganiò Mongkà zø'm nø Svrabín Koqkvm Francisí Shànshér we Pvlàcè Gvray nø nøngmaq lvpatnò dvciq lvpat rvmja ku vtoshì ràe. Shànshér we Pvlàcè Gvray nø Nønt shvløm we, dvshá zā we nvng nònggùn zí lúnlvm dvpvt nøngmaqò lvpat taqø kadvgvp gø vl ràe. Shànshér we Pvlàcè nø nøngmaq nvng tiqdø vllvm shvrúngè. Àngnø tiqlàngcè wā dvgøqshì we zaqle mø-í. Nøngmaq lvpatnò rvmja shvlá íē. Angnø dønggvng nø Nønt yvngē.   
 
Svrabín Koqkvm Francis ínø vjúrøt mvdò rì kaq Àngmaqò lvpat taqø shànshér Pvlàcè svng rvtø vrvm go we vl, mà-vl dvdvm lvm dang nvng Shànshér Pvlàcè svng dvdvm mànálvm rvt dvkv'm bø'ì. Shànshér we Pvlàcè nø nøngmaq nvng rvtø vrvm vl we dang nvng rvtø vrvm go lún ràe wànø dvkvme. Dvløt gvzàmlvmrí nvng vhø'm vdù ra dvgvp Shànshér Pvlàcè Gvrayí nøngmaq kaq svng Nønt shèlømìe . Gvray gvsangí vroqā we nvng kūnga shaq svng dvdíāe . 

Nøngmaq nø Shànshér Pvlàcèò go Kà shaq svng téwa síngràl nø tálún lvm rvt nøngmaqò lvpat taq shànshér we Pvlàcè vl we dang shálún lvm rvt angmè Mari taqkèní tiqdvtang vjúrøt dvbvng lvm rvt, Shànshér Pvlàcè Gvray kaq èrøtshì nìnø dìngman lòng svng vtōlún we dang, wè Dìngman lòng rvt nøngmaq nø mvdìng mvmàn we vtóng rì taqkèní vcarlvm vlē. Nøngmaq lvpat taqø vchvk vtà:ng Dìngman lòng nø pà íe má?. Wè Dìngman lòng nø, nøngmaq nø Gvray gvsangò shú:ngwá:mpshì we angcø àngcè rì íshàe, wà Kà íē.