"Svrabín Koqkvmpè Francisí nø Russia nvng Ukraine dvpvt gvzà mv'ngsher we vmè màriqò nøt mvsøn vdòng taqkèní vpnúng nø vjúrøt tvle lvm dang"  

"Svrabín Koqkvmpè Francisí nø Russia nvng Ukraine dvpvt gvzà mv'ngsher we vmè màriqò nøt mvsøn vdòng taqkèní vpnúng nø vjúrøt tvle lvm dang"

  Svrabín Koqkvmpè Francisí tuqdaq we march shvlá (25) ni taq Russian nvng Ukraine móngdàn dvpvt gvzà mvngsher we vmè miriqò mvsøn kaq tvle nø vpnóng lvm íwe dang march shvlá (15) ni, lvban vní ni taqø Vaticanò shvngkà dvp taqkèní dvkvng bøā.

  March shvlá (25) ni nø muqlang dvzvr í Vmè màriq kaq svng dvkvmkà zíò we bóy àngnī íe. Wè ni dørøm tut (5) nāyi rvtø, shànshérpè piter basilica Noqngøm mè chøm taqø mv-rà dvpvt nøtlíngshì we tvyø svng svrabín pè àng íni dvnúngò taqsórì vpnúng nø noqngøm we bvnlìrì svng wà lvm íbø ì.

    Wè pàdø weni taqø svrabínpèò kønmvng ku Fatima taqø tuq bø'ì we Cardinal Krajewski gø vmè màriqò Noqngøm tø'ngnø taq vkvt dø wàlvm íbø ì.
Cardinal Krajewski   nø yà shvlá nvmlat dùng taq Ukraine kaq svrabínò kønmvng ku dvzá:rò we Cardinal (2) pè kèní tiqpè íe. March shvlá (25) ni nø (1984) shànshérpè John Paul (2) kèní Russia nvng mònggvn døngtang kaq gvzà mvngsher we vmè màriqò nøt mvsøn kaq vpnúng we nøngvhøm we nøng gø íe.

Ukraine kèní Latin vtong svng cvnò we Catholic Svrado gvba rì ínø vkvt dø vpnúngà lvm rvt svrabín pè kaq March shvlá (2) ni,vm aq vnvtshì lvngcha svng gòng we lvban vshøm ni taqø tangshú:n bøā. Ukraine móngdàn taqø nvmshvr móngdànrìò vtong svng lv'ngò we Catholic rì gø vlē.

    Ukraine móngdàn taq vl Fatima Noqngøm tø'ngnø taq gø Russia vlíng vpō lvm rvt mvdøng vjúrøt we taq gø lúm lúnlvm rvt vmè màriqò Noqngøm tø'ngnø bvnlì àng kangpè shvrúngshú pè Andrzej Draws kèní March shvlá (13) ni taq Kà dvkvng bøā.

    Ukraine nvng Russia nø Urobaq taqø Tōniò àng dvja gvzà Gwà we móngdàn vní (2) móngdàn gø íe. Shvngømré ku èyvng lúngò dvgvp gø nvmshvr tut taqø Odadox lúq vtv'ng móngdàn vní (2) móngdàn gø íe. Àngmaq ínø Gvray angmè mariq kaq svng gø gvzà vpø'  shvring we taq nonggùn kūngà shaq vl rì íe.

Ukraine móngdàn nø Gvray angmè mariq kaq kadvngte vpø nø shvgùn shvringòe ma? wàwe taq Ukraine Koqkvm Yaroslavl the wise ígø (1037) nøng taq àngò móngdàn kaq svng Gvray angmè màriq kaq tvleò nø shvgùn shvring yangà. Wè rvtø taqkèní Ukraine móngdàn nø Ukraine móngdànò Koqkvm me wā vsvng mvmè í shá vrá lúngì.

  Svrabín Koqkvmpè Francis nø March shvlá (6) ni ungelu vjúrøt we tángbø'ā mèpvng vjúrøt mvdò í Ukraine móngdàn mongzøl lúnlvm dvpvt dvkvm we taq Ukraine móngdànò Koqkvm me íwe vmè Màriq wàwe Kà svng lv'ng yvngà.

"Subyiyvt Byīdōngsuq" wànø bø':ng té lúngì we dōlvnyé mvpángshì (1917) rvtø taq Russia móngdàn nø Gvray angmè mariq chøm wanø mvring rvgaq taqø shøn yàngà. Russia móngdàn vdòng Gvray angmè mariq kaq vpnúng nø tvle Noqngøm chøm rì, Vmè Màriq kaq Noqngøm we mvmè yvnglúnshì rvt íe.

Podugi móngdàn, Fatima myoq taqø Gvray àngmè Màriq dvtánshì yangì we (1917) nøng vdòng taq Gvray angmè mariq nø mvnggá (3) lòng svng dvtán yàngà.Vkvt dø (3)lòng dvtánò yv'ngkèní vní lòng taq tiqlòng íwe nvmlat mònggvn mvjàn dvtá:ng lú:ngòe. Íni gø vsvngrì ínø Gvray gvsang kaq mv-rà wá vlé lúngò kvt nø dvgá dø mvjàn tiqlòng vrá bø'n búng lùnge. Russia móngdàn gø gvzà mvngshér we Gvray angmè mariqò nøt mvsøn kaq tvle shìlvm rvt dvkvm yvngà.

Welòng mvjàn nø svrabín koqkvm Bius (11) í sasvna svng shølò we rvtø taqø bø'n yangì. Mama luchíya nø Fatima taqø Gvray angmè mariq kaq svng yv'nglúnò we cvmré (3) gø' kèní lvpat gøngzøl høqshaq cúnshì gø' gø íe. Àngí shønò we taq ' Gvray àngmè Màriq ínø Russia móngdàn kaq Vmè Màriqò nøt mvsøn kaq tvle lvm rvt, nvmlat nár vchuq ni vrvm mvrà rì vroqshi nø tvle shì weí dvgø'shì nø Vkangpè Kagvp vtōshì lvm rvt, Vmè Màriqò dvkvm Kà lòng svng cvndvgøm we íkvtkèní nø Russia nø vlíng vpō lungè. Mongzøl lòng gø lúnshì daqè. Mø-í nìnø àng dvdólshì mvyø we tvrà rì taqkèní  mònggvn kaq svng dvsher lúngòe.

Mvjàn rì gvshvt vjøn lúngòe. Sasvna kaq svng gø vtù vrè we wa lúngòe. Mongkà dvrá rì rvt lvpat gønshaq vmv'ng longè. Svrabín Koqkvmpè nø mvmè bvnlì døngja v-lì shì lòngè. Móngdàn mvmè kaq svng gø svre dvkut weí vna:n lúngòe. Vmè Màriqí dvkvm we mongkà svng cvndvgøm we wáshì kvt nø (2) baq wabaq mònggvn mvjàn mvbøn dø vgám lúnlvm ídaqe. Lvngdøm taq svrabín Koqkvmí nø Russia svng mvngsher we Vmè Màriqò nøt mvsøn kaq svng tvle weí jór lúnlvm vlē. Russia nø vlíng vpō lungè. Rvtø lvngcha tiqlòng taq mònggvn mongzøl longè wànø dvkvm we dang shøn yangà. 

   (1989) taq Mama luchíya í vrū yàngà kàru taq svrabín Koqkvmpè John Paul (2) nø vmè Màriqò røt nìmshì dvkvmkà svng cvndvgøm mà ku í (1984) nøng taq Russia svng Gvray angmè mariqò wur kaq tvleò nø noqngøm yàngà.