Svrabín Koqkvmpè Francis nø Rawanda móngdàn kèní vtì dà:mì yvk vhø'mō rì dvpvt vjúrøt dvbvng we

Svrabín Koqkvmpè Francis nø Rawanda móngdàn kèní vtì dà:mì yvk vhø'mō rì dvpvt vjúrøt dvbvng we

Svrabín Koqkvmpè Francis nø Rawanda Dvmmvdaq móngdàn dvpvt Àngò kønmvng ku bvnlì wàwe gaichuk Svrado Arnaldo Catalan kaq vlē a:mì we Nár vbíni (may 5) ni taq jénan kàru shvri bøā.

Jénan kàru taq vtì te rvt mongzøngcerì vhøm vdù we banchvk rì dvpvt tiqdø Nønt mvbyōlvm vl we dang, vjúrøt weí nítvp dø vllvm íe wàwe dang shøn bø'à.

Vkvt tì te lòng nø shø' yvngmà dvt zaq rvt ínø, rvgaq vdøl we bøn nø Vsvng shvngbe (130) gø' lvpat sømá:pmì. Wè pàdø tikwè tì rì nvng tiqdø vsvng vl chøm rì svng kéò rvt Vsvng àng yá vsérshì vdùe. Gvzà yvk we tut nø móngdànò tìbo là:pm kvyai nvng nítvp we Lake Kivu tut íwe dang shálún shìe.

Svrabín Koqkvmò dvkv'm Kà ku, Rawanda móngdànò nvmløplà:pm nvng tìbo tut taqø shì we vsvng lùpàdø dìn gvyà we gø lùqwe dang, ya tōniò banchvk rì rvt àngdeò døngku vsvngrì sømvhømò rì, Dàm vhøm bø'à rì Shvngbe dvpvt gø vjúrøt dvbvng we dang dvkvme.

Svrabín Koqkvmpè nø Rawanda mongzøngcerì kaq svng shvmán nø àng Nønt yór taqsórí vjúrøt dvbvng jénan Kà svng lvngdøm taq dvtan bø'à.

Rawanda móngdànò Wunji chuk Edouard Ngirente í tōniò lvngcha dàm vhø'm bø'à we shvrà rvgaq rì svng dì nø yvng bø'à. Lvpat cømlòng nø vkvt gorø mvdvmø lùqwe dang mvsøng bøā.

Móngdàn vsuyaq kèní gø gvzà vchvk we rvgaq rì kaq svng tùbùm we tuqlúnlvm rvt dvnungò we íe. Pàwàlvm wànì tí te nø rvgaq vdøl we shvra rì vdòng vl mongzøngcerì kaq vl lvm shvrà vsé:rà nø shiyat chømce rì taq vl dvzvr bø'à we íe. Vba tì rì narshì høqshaq, mongzøngcerì wè shvrà rì taqø tiqlàng dvgøqshì lúnlvm rvt vmìng vkang vl rì í dvkv'm bø'à.