Svrabín koqkvmpè nø Ukraine móngdàn taqø dvshà mvhø't vhø'mò rì dvpvt dvdvmà nø vjú røtním dvbvnga we.

Svrabín koqkvmpè nø Ukraine móngdàn taqø dvshà mvhø't vhø'mò rì dvpvt dvdvmà nø vjú røtním dvbvnga we.

         Svrabín koqkvmpè nø vlēá:mi we zun bóy rvtø vshøm lvban nár nī vyvng rvtø taq " muqlang Koqkvm me "  vjúrøt kà shvring shì bø'ì mèpvng Ukraine móngdàn taqø dvshà mvhø't vhø'mò rì dvpvt vjúrøt dvbvng lvm rvt, Ya shvlá nø Vmè Mariq kaq mvdøng vpø nøntni shvring shì we shvlá gø íwe dang, Wervt mongzøl lvm dvpvt nvng Rosary vjú nī vrvm røtlvm rvt shvngømré rvzvngcerì kaq svng dvkvm bøā we íē. 

            Svrabín koqkvmpè í àng chì:m ku Ukraine móngdànò myoq tiq myoq íwe " Medōò myoq " wanø Vsvng mvmè í sháò we Mariupol myoq svng dvdvm we dang, pàwálvm wani Vsvng nønt mvzv'ngshì we í bum rì dvpok we, shvtín gvyaq we  wàò we dang,   íwe mvzan rvt lo tvrà shø kéò we mongzøngcerì kaq dvshá zā we bvnlì taqkèní tùbùm dvbàng we tvyø rì wáā lúnlvm rvt svrabín Koqkvmpè taqkèní vnv'n nø røt nìmshìe.
        Mvzan vhø'mò we Ukraine móngzøngcerì, lvpat shvrøng nø gøng we shaqré rì, cvmrécerìò lvpat svng dvdvmà weí gvzà nønt yòr lvm vl we dang, nēcì vla shì we dang, cvmrérì nvng singdø gvzà nønt mvshøm lvm shvngkà tálúnshi we dang, svrabín Koqkvmpè taqkèní dvshà mvhø't vhø'mò rì dvpvt mvré za we dang, mònggvn kèní mongzøl lòng svng jøngjø'ng ni shvrúng íe wàni Vsvng mvmè nø dvgoqshì ra màdá shvre lvm rì nvng wā dvnzøng nø vhøm shì rvtø taq tiqlòng lòng wá vtù we taq mv-wáshì lòng nø gvzà dālvm rà íe. mvzan rì svng yìl nø, kà taqkèní wā v-toq v-tip vrashì lòng svng gø yìlshì nø lvknak rì svng nar dvzvr lún we tvrà vlē mà?. Jøngjø'ng vl nìnø svrabín Koqkvmpè í dvnúngà lún dø røt Kà svng shøn bøā we íē.

             Gvzvm we bvnlìrì, lvknak rì taqkèní mvzan svng shvbøn lúnò we dangrì svng vkvng mvzi, mongzøl lòng nvng v-toq v-tip vra shìlvm lòng svng wā rvzvngshì ràe. Vjúrøt dvbvng ì wanø shøn bø'à.