"Svrabin Koqkvm Francisí American dvmmvdaq angshvrpè svng vtoò we shvngkà"

"Svrabin Koqkvm Francisí American dvmmvdaq angshvrpè svng vtoò we shvngkà"

American móngdan mongøp kimvng Vgò shaqré rvzvng we boy taq mongjøngcerìì rvzvng bøā we (46) pè wapè dvmmvdaq Mongkà Kàsvdiq zíshì nø dvkvmshì we tvyø svng Pamvrace mongzøl dø wálun bøā we íe.

Svrabin Koqkvm Francis kèní gø dvmmvdaq angshvrpè jubaitin svng dvgúng zíbøā we íe. Svrabin Koqkvm, ang pamvra wàwe Kà vdòng taq dvmmvdaq angshvr dvpvt vjúrøt dvba:ng lvm íwe dang, gvray yv'ng kèní shánønt zit-nønt paqzí gálòng nvng jór nònggwøn gungàshaq dvsházà lvm, móngdvn vdòng tasvng vcíng kelvm, vrvmvralvm nvng mongzøllvm lòng svng téwa dvzaq dvgvngshi weí hangnø dvnúng lúnlvm , Dvmmvdaq angshvr í shølwe lvngpàng American mongjøngcerìì móngdvn nvmlat vrvng pvngyàngà we kashvbung vldø tiqdvchà móngdvn tvrà, vzømvzvp lvm tvrà, Shvngømré tvrà àng dvpø rì svng téwa vpø shvring nø dvnúng lúnlvm, Dvmmvdaq angshvr angò mvnggá gvlshìrì shvngbè svng gø vbóngvtuk dø dvrá vdòng taq vzømvzvp nø vrvngshì we bvnlìrìwà ílvm, mongjøngce gø vrvmmō dvgúng nvng vlún vkvngrì svng gø vpølv'm, dvshà mvhøq vhømòrì, ròqgar shú màdárì, shønlvm vmíngkang mv-lunòrì svng gø ròqgar lúnlvm rvt dvkvm bøā we íe.

Vkvt dø dvmmvdaq angshvr rvzvng bøò kvt Svrabin Koqkvm taq kèní kàrū shvrīnø dvmvn weí vpø shvring we vtóng vlē. American dvmmvdaq jubaitin nø Svrabin Koqkvm Francis nvng (2013) tiqbaq democratic dvmmvdaq UBama lvpat taq dùq dvmmvdaq ku bvnlìri we lvpat taq tiqpaq, (2015) nøng taq washingdan DC yv'ng vtō we taq tiqpaq vhøm yvngì we íe.