"Svrabin Koqkvmpè Francis nø Mongkà dvtøp paqzi vdè tiqpè gø' ídø tiqdvchá vyvng roqshú tiqpè gø' íwe dang"

"Svrabin Koqkvmpè Francis nø Mongkà dvtøp paqzi vdè tiqpè gø' ídø tiqdvchá vyvng roqshú tiqpè gø' íwe dang"

    Àngnøng mvmè Svrabín Koqkvmpè Francis kaq sháò we vsvngrì, àng lvpat mvshøl svng nønt lúm we vsvngrì ínø Svrabin Koqkvm kaq svng Mongkà dvtøp paqzi vdè ímà?, Vyvng roqshúpè ímà? wā dvdvm a:tiqe. Gvzà màle we rvtø taq wà lún bøā we ‘Francis: Pastor and Theologian’ ( Francis- Mongkà dvtøp paqzi vdè nvng vyvng roqshú ) lega bok taq Svrabin Koqkvm nø vkvt dø pòqe vní lòng svng vtoshì lúnò pè gø íwe dang shangshang wā shønò we íe. Yalòng Kàru bok nø svrabín Koqkvmò shølshú vgo bùngsàn, dì we tvrà hwáng svng Paciluna the Ateneu Universitari Sant Pacià Dvtgvdū kèní Paqzí vdè lvnglirì í gun dvtøp lúnò we svng shálún shìe. Svrabín Koqkvm Francis nø dvbùshang Mongkà vdòng taqkèní yv'ng lúnò rì cvnshì nø dvshvngò weí svkse wáshì we íe. We pàdø dvbùshang Mongkà taqkèní vtoshì lúnò we shvngømré dvtøp paqzi, mv-køm mv-dup rì svng gø døngngàng dø shøn lúnò pè gø íe.

       Vyvng roqshú tiqpè ku àng taqø vyvng roqshú bvnlì døngja svng mà-gé dø dvnung lúnlvm rvt gvzà rvnaq dø dvtøp lúnò we paqzi vdè tiqpè gø íe. Vkvt dø dvtøp paqzi rì yv'ng kèní nøngmaq kaq svng dvtvne wanø cardinal JUAN JOSÉ OMELLA i shøn bøā. Rvtkà Dvtøpmò lòng zi we taq Detgvdūò Zong øp íwe ARMAND PUIG ígø vyvng roqshú nø àng gønshaq svng mà mvpashi gø íe wàe. Mongzøl lòng zí lúnlvm rvt rvtø vrvm dvdàmò pè gø íe. Svrabín Koqkvmò Kàpung Mongkàrì nø zā vsvng gø vrvmi cíng sháòe. Tiqmaq bvnlì dvgvngri taq nø mvcíng mvral we gø vl sháòe. Shøn mvyø we taq àng mvtúrì tøpni tøprang shá lúnlvm mvdvm zí mvyø we shvngkà nø mvdøng írvt kàciq angdùng ku wā shønshì we dang íe.Vsvng góng tiqgø'ò mvtúrì èshøn lú:ngò dvgvp mvrshvm svng mvdøng yvng nø shønshì we dang íe.

       Mvrshvm nvng singdø èshøn longò dvgvp ngvmshì we góng dvgvngri shvngbe svng shønshì weò vbóngè, wàe. Kàru bok taq Svrabin Koqkvm nvng singdø vchvk we Kà vgorì svng wā dvtvnò e. Kà shvbóng tiqdø shvbóng nø wáshì we, dvsháhotrìò bvnlì mvtúrì, dvtøp we nvng kvmnønt tvrà mà-bóng we shvngømré tāsvng mv-ngu shi nø vhøm we Kà vgorì íe. Yalòng Kàru bok svng røò lòngì dèni laò rvtørì svng cíngrallvm ínø, vzàng kaq Sasvna nvng mònggang svng mv-kok lúnlvm, gá lòng vtoshì lúnlvm vmíng vkvng tiqlòng íe.

Kà tvling David Ah Pong