"Svrado gvba Paul zing Htung Grawng dvpvt tiqnøng nøng vhøm mvrøt dvdàm vjúrøt dvbvng we"

"Svrado gvba Paul zing Htung Grawng dvpvt tiqnøng nøng vhøm mvrøt dvdàm vjúrøt dvbvng we"(23.10.2021) 

  Svrado gvba Paul zing Htung Grawng Gvray vdòngø mà-vl bøì we tiqnøng nøng vhøm mvrøt dvdàm vjúrøt dvbvng we bvnlì svng (24.10.2021) rvtø vsháng 10 nāyi Nānshē Bosco noqngøm chøm yv'ngø kachin rvzvngce døngku vsvngrì taqkèní shøl nø wà bøà we íe. Shvrúngshú gvba Rev. Fr. Philip Naw Aung i shøl nø Rev. Fr. Bosco Bo Bo taqkèní cúnshì we Gvray Mongkà i dvshat nø Sasvna vshit vzinglvm kangpè àngnī nvng tiqdø svradopè Paul zing Htung Grawng pvlace dvpvt gø Vjúrøt dvbvng we bóy wáò we dang, Catholic rvzvngcerì gø vrvm nø àngde nø àngde cipshì lúnlvm vchvk we dang, tiqdvr vsvngrì mvdvmø dvtit tvlé lvm ra we dang, àngdeò mv-rà rì svng dvshershi lúnlvm vchvk we dang, àngdeò lvpat døngku lvpat, Sasvna dvpvt vp nóngshì vsvng ílvm vchvk we dang kàshvbòngrì taqkèní nonggùn lùshì lvm dvshvng bøā we íē.          Zvndvttut pvlàcè ò àng dvpø nø rvgaq yachang mvdvm àng dvpø téwa vl rvt nøngmaq nø mvdo tiqlòng taq rvzvngce tiqgø'wā íshà nigø dvbùshang Sasvna bvnlìrì taq zøm shì lúnlvm vchvk we dang, svradopè Paul taqkèní nøngmaq kaq svng shvngøt dvtú we dang, svradopè nø muqlang móngdàn kaq góng lúnbøā rvt nøngmaqì nø svradopè dvpvt vjúrøt dvbvng we mø-í nø nøngmaq nø le svradopè taqkèní tiqdvtvng vjúrøt shìlvm ra bøì nø shvngøt dvtú we dang svng dvdam nø cúnshì lúnlvm vchvk we dang, svradopè taqkèní dvtán we tvrà vdòngø cúnshì lúnlvm vchvk ngè wanø dvkvm bøì.

        Svradopè Paul Zing Htung Grawngò tiqnøng nøng vhøm dvdàm mvrøt vjúrøt dvbvng lìpòng svng shwè nvlóngdō Noqngøm chøm me yv'ngø kangpè àngnī Noqngøm rvtø nvng tiqdø wàbøà we íe. Svrado gvba Paul zing Htung Grawng nø Myanmar móng Kachin vsvng pvn dvcì taqkèní nvmlat tiq shvrúngshú tiqpè gø ídø tiqdvchá nvmlat tiq svradopè gø íe. Svradopè Paul Zing Htung Grawng nø 2020 nøng, October shvlá (24) ni Mandalay myoq taqø Gvray vdòngø mà-vl bøì we íe.