Tokyo Catholic shvngømré svradorì àngké mvdò taqkèní Olympic dvløt gømcøp bóymè dvpat pvlàcè dang dvpat vjú røt tìyørì wàlvm mvvl wanø dvtú we

Tokyo Catholic shvngømré svradorì àngké mvdò taqkèní Olympic dvløt gømcøp bóymè dvpat pvlàcè dang dvpat vjú røt tìyørì wàlvm mvvl wanø dvtú we

Japan móngdàn í chøm àngkàng wáshìnø wàòwe Olympic bóymè pvngshì ráì we ínìgø Covid 19 yóga dvjáng lòngnø zømvmwe tvrà mvvl téwa vkøn mvnshì weno íe. Gùn dvtøp we taq Japan móngdàn vdòng Covid 19 yóga í za vsvng 848000 gø vlnø we zønlií shì bøì we vsvng 15000 gø í:vmì wae. Weratnø móngdàn vdòng wá vduwe tìyørì shvngbe svng vrá tiqkvt dvtøp nø wá vdue wanø dvkám we íe. Nvmlat taqnø we gøncøt dvløt bóymè taq tuqrawe Catholic shvngømré vsvngrì dvpat pvlàcè dang vjú røt tìyørì wàlvm dvgø shaq íwe ínìgø yadø zønli dvjáng vgám lúnlvm tvrà nvng singnø nvr vdu v:mì. Yadang nvng singnø Tokyo Catholic shvngømré svradorì àngké vgo pè Tarcisio Isao Kikuchi taqkèní dvkám bøà we íe. Nvmlat nøt vrá kàciqrì taqnø Olympic bóymè kaq tuqrawe gøncøp lànglìrì dvpat kàpvn 3 pvn taq kèní Cathedral taq ni vrvm Mass noqngøm tìyørì, Rosary vjú røt tìyørì wàlvm nøt vrá shaq íe. Ínìgø yadø svre dvkéwe dvjáng zønli long rat móng øpshú vgorì taqkèní Olympic gøncøp lànglìrì svng àngmaq mvnvmwe shvràrì kèní léshìwe mvwàlvm vrá dvkám bøà.

  Wedøni shvngømré shølshú vgorì taqkèní gø pvlàcè dang vjú røt tìyørì wàlvm vko vkángrì nvr vdu v:mì. Yadø Covid 19 yóga zønli vgámwe tvrà svng cvndøng lvm nø vsvng gø vrvm taq døngjá vlwe írat we cvndøng dvrárì svng cvndøng dvzaqshì lvm nvng noqngøm tìyørì svng nvmbøng tvrà taqkèní wa dvkangā lvm íwe svng dvtú bøà we íe.

  Jøng jøng taqnø ya (32) boq waboq Olympic bóymè nø vle vmì we 2020 nøng July 24 ni kèní August 9 ni dvhø wá vduwe ínìgø yóga dvjáng yalòng rat dènø July 23 ni kèní August 8 dvhø svng shøt vdu bøì wegø íe. Hí wur dvciq, mvkøm mvzøpwe vsvngrì ò Olympic bóymè svng gø wedøni vle vmì we nøng kèní dènøng August 24- September 5 svng shøt nø wàlvm íwe svng shálún shìe.