Turkey móngdàn taq noqngøm tøngnø tiqlòng vrá Islam bvli waò we shvngkà

Hagia Sophia noqngøm tøngnø svng dvtan chøm wàò we taq kèní bvli chøm svng wàbøà we tiq lvbán naq bøì mèpvng móngdàn øpshúpè taq kèní Higia Sophia noqngøm chøm dángte bøng mvte we ínìgø mvshøl vlwe noqngøm chøm tiqlòng svng bvli wa lvm dvkám bøà. Chora myoq taq vl we chutcháng we noqngøm chømnø 14 yazuq taq rvmul paqzí àngpvn pvn taqkèní wa yàngà we íe. Turkey móng øp pè Recip Tayyip Erdogan taqkèní welòng noqngøm tøngnø svng dvtan chøm waò we taq kèní Islam bvli svng vlíng vpo lvm dvkám bøà. Hagia Sophia dø tiq dvchá Constantinople shvngømré rìò noqngøm tøngnø íwe we noqngøm tøngnø svng AD 1453 nøng taq Automán ngànshàrìí gvsat we taqkèní lutshì bøì mèpvng AD 1945 nøng mèpvng nø dvtan chøm wa bøà we íe. Turkey móngdàn vdòng taq 4 yazuq nvng 11 yazuq dvhø wa yàngà we noqngøm chømrì gvzà vlwe ínìgø nàmnø wawe í tinwe gø gvzà vl ráì. Ya noqngøm chøm nvng sing nø American móngdàn taq dvbùshvng bvnlì wa we Greek Autodox svradopè Elpidophores kèní yàdø noqngøm tøngnørì mà dvrádø tølá:mò we svng móngdàn vràm kèní dvjaq dàng wá vdue má wanø tvnùng kàru vtànvtnà.