"Ukraine kèní dvbùshang sasvna bvnlì wà rì vkvt dø dvja rvt rvgaq dvrìt myoq taqø máshì nø, móngzøngcerì nvng tiqdø vl nø vlún dvngte tùbùm dvbàng we shvngkà"

"Ukraine kèní dvbùshang sasvna bvnlì wà rì vkvt dø dvja rvt rvgaq dvrìt myoq taqø máshì nø,móngzøngcerì nvng tiqdø vl nø vlún dvngte tùbùm dvbàng we shvngkà"

Lviv myoq nø Ukraine móngdànò nvmlø:pm lap taq vl nø, Ukraineò nvmlø:pm lap myoq wanø gø mvcøng shvlàe. Wè myoq nø Russia rìí vsvng dø mà dvdut nø shvt we taqkèní lutshi lúngì rì
mvdvmø tiqkvt nārshì yv'ngkèní myoq bø'n lúngì. Wè yv'ngkèní tiq dvtáng dvgá rvgaq dvrìt myoq íwe Poland, Romanian, salovakia, nvng hungary móngdàn kaq vtshìlvm rvt vmíng vkvng svng cāò nø dvgø'shì we shvrà gø íe. Guqlaqdàmvgaqí shvngkà dvkvngò we àng dvja ku Russia í Ukraine kaq sè we mvjàn rvtø kèní cvmré (7.5) wvn dvngte nø gvzà svre dvké we dvja taq vlē wànø shønòe. Lviv myoqò rvgaq dvrìt taqø vl nø Italy sasvna bvnlì wàrì ínø vkvt dø dvshà mvhø't vhø'mò we cvmrérì, døngku àngmè rì kaq svng tùbùm dvbàngòe. Italy dvbùshang sasvna shvrúngshú pè Moreno Cattelan nø nvmlat tùbùm dvbàng we mvdò nvng romenia móngdàn kaq svng búng nø dì yangì.

Shvrúngshú pè Moreno Cattelan nø Italy dvcì shvrúngshú tiqpè íwe Don Orione í wà yvngà we ‘Sons of Divine Providence’( Gvray kaq yvnglún weò àngcèrì ) shvrúngshú mvdò taqkèní tiqpè íe. Cvmrérì mongzøl dø gvlshi lvm dvgø'shì bøì mèpvng mvjàn bø'n we shvrà rì kaq svng vrá lo lúngì. mvjàn bø'n we íni gø àngde lutshi lúnlvm rvt wā mø-í. Dvshà mvhø't vhø'mò rì nvng tārá ílvm Kà shvdiq zíshì rvt móngzøngcerì kaq svng ngvm nø vwángshìlvm mø-í. Kadø íwe rvtø taq íni gø lvngdøm høqshaq móngzøngcerì nvng tiqdø vllvm íbø ì. Mvjàn gvzà bø'n we shvrà yv'ng kèní vrá vtv'ng nø, lviv myoq taq tiqkvt nārshì nø, cvmrérì nvng angmè maq kaq svng vlún dø tùbùm dvbàng shì we íe.

Lviv myoq taqø àngmaq kaq svng roqgar we shvrà taq kokdø'ng, tìzvlshìlvm kokdø'ng, vmpà køtlvm kokdø'ng rì vlē. Àngwa shvrà taq cvmré shøq dv'ngí tiqshvlá íwe cvmré angmè maq nvng cvmrérì tiqdø tuq rái. Wè dø íwe dvja rì taq vkvt dø cvmré gunicèrì nvng angmèmaq Vsvng mvmè lúq dø vl we shvrà nvng kadø gø vl màdu we íe. Wè shvrúngshú pè nø Ukraine taq bvnlì wàwe (17) nøng íbø ì. Wervt nø gø àng taqkèní àngò chøm (2) lòng íwe Ukraine móng kèní rálshì nø àngò angmè móngdàn kaq svng kadø wā lo mvlúnò. Bø'n búng we shvngbe móngzøngcerì nvng tiqdø ílvm nønt rvt shì bø'ì. Wè lòng rvt Ukraine Vsvng pv'n dvcì, àngmaqò tong laqya, kvmnønt tvrà taq vzaqshi we, vrv'm vrá we, tiqnønt tiqmvyùng vl sháshì we, àng dvgung, dvcì dvgøng tiqlòng wā ílún we yàri nø àng dvpvt àngò lvpat taq mv-køm mv-døp rì íe wanø vtōshì lúnò è.Urobaq tø'ngtáng kèní shvngømré rvzvngce mvdò vrvm nvng vsuyaq mø-í we mvdò vrvm nvng vzø'm weí mvjàn rvt yìlshì nø dvshà mvhø't vhø'mò we Vsvngrì kaq svng dvshá zā nø tùbùm dvbàng shì we, shøngløm we shvrà rì kaq svng gvlā we bvnlìrì svng gø dvnúngà nø wáā è.