Ukrine mvjàn rvtnø̀ dvtuq shìrà vmvng bǿì we cv̀mré rì dvpvt shvngø̀mré kèní dvsháza cháng shvlut we bv̀nlì wáshì ráì

Ukrine mvjàn rvtnø̀ dvtuq shìrà vmvng bǿì we cv̀mré rì dvpvt shvngø̀mré kèní dvsháza cháng shvlut we bv̀nlì wáshì ráì.
Russia móng nvng Ukrine móngdàn mvjàn rì rvt Ukrine móngdàn vsv̀ngrì (14) sé sèn rvzé gǿ nø lutshì shvrà rì svng yilshì bǿì we íe. Werì taqkèní vsv̀ng tiqmaq nø wángzà móngdàn rì høqshaq yilshì bǿì. Móngdàn vdòng taq vdǿn kéò we tiqmaq nø cv̀mré rì ni íe. Àngmaq nø sv̀ngpv̀n dvsháza mvdòrì taqkèní lvpvt dvtut cúnshì lúnwe vsv̀ngrì gø íráì. Wedø sv̀ngpv̀n dvsháza mvdò rì taqkèní mònggv̀n yv̀mbv̀n vsv̀ngrì kaq tubùm dvbangā we Catholic shvngø̀mré Commission mvdò gø dvsháza bv̀nlì kèní shvlut dvbang we tiqmvdò íe. We mvdò ò bv̀nlì àngkàngpè nø Mgsr. Robert Vitillo ínø̀ àngtaqkèní wedø cv̀mré rì dvshá mvhøt vhǿmò we dang svng yv̀ngnø vtang kèní nøt yòrlv́m tvrà íwe dang vtàn bǿà. 
Àngtaqkèní wedø shvngø̀mré ku lutshì shvrà rì dvgǿā shaq shvrà rì svng tùng dinø̀ cv̀mré rì ò dvshà mvhøt we àngmaqò lvpat rì nøt mvsø̀n rì svng vrá nøt shvlø̀m dvbanā we nvng we shvràrì taq vyáng yaqdø̀ng shvnat mvzø rì dvhø̀ taq lvpat lutshì lv́m dvpvt rvtø̀ vrv̀m yilshì, vtshì ràwe dangrì vtàn ráà. Vsv̀ng tiqmaq nø we shvrà rì taqni lvpat zíshì vmwe vsv̀ngrì gø yv́ngshì we dang, téwa nøt mvbyo lv́m íwe tvrà nø vdè móng vdè rvgaq svng gurshì vdu nø yilshì ràwe rvtø̀ rì taq we àngmaqò rvgaqrì shvngbe nø mvjàn svmi kèní vrø̀l bǿì wawe kà shaqrì táshì longwe kvt vtang kèní nøt yòl lv́m lv we dang dvtú vtnà we íe. 
We Catholic shvngø̀mré dvsháza tubùm dvbangā we àngmvdò nø dvgá sv̀ngpv̀n dvsháza mvdò rì nvng vzø̀mnø̀ bv̀nlì wawe gø íe. Àngmaqò bv̀nlì àngké róng svng Chortkiv taq rungnø wáshì wegø íe. We bv̀nlì àngké róng taqnø Sister Josephata rung nø bv̀nlì pvranā we íe. Àngtaqkèní gø wedø mvjànrì dvhø̀ taq dvshà mvhøt vhǿmò nø dvtuqshì shvrà vmvng we cv̀mré rì svng rvtø ò nø vcù:ngò wegø íe. 
Ukrine móngdàn nø mvjàn cvn cvn zømnø cømsaq lv́m tvrà lún vdu á:mì. Wedø ínø wa yadø àngpè, àngmè màdá dvtuq shìra vmvngwe cvmré rì vl-lv́m lòng zø̀mvme. Yadø dvshà mvhøt we cv̀mré rì ò àngpè, àngmè tiqmaq nø mvjàn taq cǿm bǿì we nvng tiqmaq nø àngmaqò àngcǿ àngcè rì kaqsvng kadøgø vcúng mvlún:ò we vsv̀ngrì gø vbá we íe. 
Yadø cv̀mré vcùng nø cháng, shvlut we shvrà tiqlòng nø Tetiana Dubyna mvdò kèní vcù:ngòe wae. We shvrà taqnø vtang kèní dvshà mvhøt vhǿmò we cv̀mré rì svng vcù:ngò we tiq shvrà gø íe. Wedø íwe shvrà rì svng tuqrawe cv̀mré rì kaq nøt shvlø̀m, vcúng mvkok we tvrà svng yv́ngshì we rvt vtang kèní gø dvbù:nge wanø Msgr. Vitllo taqkèní vtàn lú:ngà. 
Mvjàn dvhø kèní svmaré rì tiqmaq nø shagóng mvnyam ké vhǿ:mò nø cv̀mré góng nvng tuqrawe vsv̀ngrì gø vlnø àngmaq kaq gø sv̀ngpv̀n dvsháza bv̀nlìrì taqkèní dvbangā we bv̀nlì rì gø wáshì we íe. 
Ukrine móngdàn taq vlwe sv̀ngpv̀n dvsháza mvdò rì taqkèní vtang shaq vjú vlwe dvsháza bv̀nlì rì wá dvzaq shìnø cv̀mré rì svng vcùng we bv̀nlì rì shvngbe gø gvzà ni vjú vlwe dang Msgr. Taqkèní dvkám bǿà wegø íe.