Vaticanò vsvng pvn dvbv:ngò we mvdò rúng taq bvnlì dvzøm lvm Sister tiqgø svng bvnlì døngjá dvnùng bøà we shvngkà.

Vaticanò vsvng pvn dvbv:ngò we mvdò rúng taq bvnlì dvzøm lvm Sister tiqgø svng bvnlì døngjá dvnùng bøà we shvngkà.

Svràbín koqkám pè Francisí Vaticanò vsvngpvn dvbv:ngò mvdòò adwi yémú angshvr svng bvnlì døngjá zíbøà we íe. We rúng gvbà nø gvza mòngzøl nø shvla we

bvnlì rìsvng wàò we íe. Kàshvdún dvshá mvhøt we dang, wurlaq bvnlì dang, lvngchà nvng sing we dang taq kèní yat nø vsvl shìwe vsvng rìkaq dvbv:ngò we mvdò íe.

Vkvt angshvr bvnlì dvnùng bøà we vtwi yémú nø vsvk (46) nøng vhøm we SR. tiqgø íe. Angò bøng nø SR. Alessadra Smerilli, F.M.A. íe.

Yãrvtø taq vkøn we covid vna zinlì svng vhøm shìrvt nøngmaq shvngbè nø shø tiqgøm taq zún shìnø vlì we íshàe. Yadang te vchvk we svng singshá we mv-vl ínìnø cvrè

dvké we vna zinlì vkøn we yáng kèní lùtshì lvm nø kadø gø mvbøn we íe. Kà shvdún nø yógà vgám cìtú we dang rìgø íe. Vna yógà vgám cìtú we svng mònggàn vrvm taq

vlwe dvshà we vsvng vrvm tuq lvm kàdø gø bøn mvdaq we íe.

Vkvt angshvr bvnlì døngjá dvnùng bøà we SRò vzang taq bvnlì rìwe FR.Bruno Marie Duffé a:ngò shvrà nvng dvgá shrà vní shvrà taq bvnlì døngjá dvnùng bøà we íe.

FR. Bruno Marie Duffé nø France móngdàn kèní ínø, a:ngò vsvk (70) nøng íámìnø a:ngò vl shvrà France móngdàn Lyon wamà svng lòámì we íe.

Dvgá shvrà tiqyvng taqnø Argentina nvng England móngdàn taq pàqzí shvngøtnò we FR. Augusto Zampiniò shvrà taq íe. Angnø wurlaq bvnlì dang pàqzí vdè tiqpè ínø,

ang gø a:ngò vlrà taq lòlvm dán shìwe íe. Vkvt dø dvtúò wenø vlèbøì we June, nvng July shvlá taq Svràbín koqkám pèí dvzvrò we nvng Cadinal Blase Cupich nø we

rúng yáng yvngbøà kvt kèní vkvt dø shvrà lvjáng shìrà bøì we svng shálún shìwe íe.