"Vatican dvtvn chømme vrá tiqkvt poqlvm Shvngkà"

"Vatican dvtvn chømme vrá tiqkvt poqlvm Shvngkà"

 Covid 19 yóga Zønlì vsher vzíngyùl rvt  dènøng September shvlá kèní vrá tiqkvt puqlvm íà:mì wanø dvrá shang dvkvngbøà we ínigø vníbaq wabaq Covid 19 Zønli vrá tiqkvt vsher lú:ngì rvt dvdvmshi bøìdø poq mà-lúnbøì. Vkvt dø (88) nī narshì bøì yv'ng kèní (2021, February 1)nī taqkèní vrá tiqkvt poqshì bøì we íe. Vaticanò dvtvn chømme svng Svrabin Koqkvmò dvtvn chømme wanø gø tøòe, vkvt dø vrá tiqkvt puqshìbøì nigø zaqle rì dvpvt shiqshàn tvrà nvng vdùvbóngdø nonggup wūmshi lvm, wūrciqshìlvm, vcar dø rip nø dìlvm dangri svng dvkvme. Dvtvn chømme svng dìlvm zaqlerì shvngbè nø nvmlat vzv'ngkaq røtshì wē vl ràe.

 Dvtvn chømme svng puqshì weò dìlú:ngì we  Patrizio taqkèní gø àngwà nøng nø; Vsvng mvngpòng ínø yabaq nø dì Vsvngrì mvluq weí rvt yv'ng we taq nøntshøm dvbulvm vl we dang, dvtvn chømme nø shiqshàn tvrà nvng vdù vbóngdø , dvtúwe taq bvnlì vpvtrì taqkèní gø chvkwà shøl nø dìrì kèní dvtvn chømmeò vpø nø ringrì svng gø nøntshømdø yvnglún we dāng,Sømla coy nø rvmøl we Svra Raphael kèní St. Mycal ungelus høq àngmaqò laqmùrì svng yvngnø dvbùnøntshømlvm vl we dang, tiqni taq dì Vsvngrì shvngbè (23000) gø kèní (24000) king gø høq kømngøm we svng gø shálún shìe. Svrabin Koqkvmò Noqngøm wang sistin Noqngøm chøm vdòngø lóngí rvmølshaqri svng gø yànila vdòng taq shvngshvngwace yvnglún shìe.

 Dvtvn chømme svng yv'ng nvng dìlú:ngì we Marie Christine taqkèní gø gvzà nøntshøm dvbù lúnò we dāng, dvtvnò we Darìò shvnvp we nimzi wūrlaqmùrì svng nāmshìcè yv'nglúnshì we dāng,
téwà nø Svrabin Koqkvmò Noqngøm chømme svng nāmshìcè yv'nglúnshì bøì. yabaq nø rvtø mvmè zíshì nø Vaticanò dvtvn chømme vdòng taq vl we darì dvgvpmō nimzi wūr laqmùrì Paqzírì svng tøptøp wàce yv'ng lúnshìbøì wanø shønòe. Vdè taqkèní dì mvlúnò we íni gø www.musivaticani.va online svng gòng nø yv'ng lúnshìe, wàe.