Vatican yvng svng zaqle wang dìrì nø Covid-19 vgám cìtú dáng shì bøìrì írae wawe shvngkà.

Vatican yvng svng zaqle wang dìrì nø Covid-19 vgám cìtú dáng shì bøìrì írae wawe shvngkà.

Vatican yvng svng zaqle wang dìrì nvng bvnlì dvzømshú wòntán rì Shvngbè Covid-19 vgám cìtú dáng shì bøìwe rì,(mvínìnø) Covid-19 àna zànø zøm daq werì,(mvínìnø) cì jepmò ke negative shá dvzvr we vatican yvng kèní (mvínìnø) vdèò Móngdàn kèní shá dvzvr we lvmat dvtvn lún ràe. Pàrvt ímá wanìnø October shvlá (1) nì kèní mònggàn vrvm taq kèní zaqlè wang dìwe dang pvng lvm íe wanø August (20) nì taq kà dvshvng bøà we íe. Vaticanò Ukchuk yémú íwe cadinal Giuseppe Bertelloí, Svràbín koqhám pè Francisí Covid àna zønlì vkøn we taq kèní vgám lvm dvpvt ràwe dang dvlú dvgø' shìlvm dvtú we rvt vkvt dø dvtvn bø shà we íe. Kahtolic Shvngømré rìgø vatican taq nøqngøm lúnlvm dvpvt Covid vgám cìtú dáng shì bøìwe rìwa vtò lvm íe.

  Covid-19 yógà vgám cìtú dáng shì børì lá:ngò we gat svng 'Green Pass' wàe. We gatnø (6) shvlá dvpvt taòqkàn shìwe íràe. Italy móngdàn vsúyaq ígø 'Green Pass' svng taòqkàn bøà wanø october shvlá (5) nì taq kèní wurlaq bvnlì wàwe mvdò ínìgø vsvng vrvm nvng vhøm nø vtoqvtip we rì Shvngbè we gatsvng langlvm dvtú shì bøìwe íe. We gat mvlwe vsvng rìkaq nø bvnlì taq kèní tiqlvngcè nvlshì dvzvr lvm nvng dàmnø American dollar (1800) zí ràe.

   August shvlá (1) nì kèní Italy móngdàn vdúng taq chøm vkánrì, singrì, byàqdaìtrì, nvng vsvng gvza dìwe shvrà rì taq covid vgám cìtú dáng shì bøìwe dvtvn lvm ràwe íe. September shvlá taq kèní móngdàn vdúng taq zaqlè wang dìwe vsvngrì dvpvt mvdøng vchvk we íe. Tiqmaq bvnlì wangrì, cìrúng rì nvng zùngrì taq gø dvtvn ràwe íe. Vatican kaqsvng zaqlè wang dìwe rì nvng bvnlì dzømshú rì shvngbè covid-19 àna vgám cìtú lvm dvtú we svng september (18) nì taq letmattú shìnø dvtvn bøà we íe. Italy móngdàn vsúyaq rìí gø wedø covid vgám cìtú we svng mvsvt lvm røtnèm shìwe íe. Wedø waò we svng sitlvm vatican yé mvdò rìí bvnlì walvm íe.

   Wedø shini màdvtvnò we vzang taq Svràbin koqhám pè Francis nø september (7) yaq taq Vaticanò Ukchuk yémú Cadinal Bertello nvng vhøm da:ngí zaqlè wang dìwe vsvng rì dvpvt mvsvt shì bøìwe íe. Pà rvt ímá wanìnø dvgá vchvk we zaqlè wang dìrì nø vsvng rìò zidang nvng lún vdu we vkoq vkáng svng vpøì rvt íe. October (1) nì taq kèní mvdvm yvng dvtvn shì bøìwe svng cvndøng ràwe íe. Wedø tiq dvchá Florence wamà taq vlwe nøqngøm zùng gvbà rì, Venice wamà vdúng taq vlwe St. Mark's Basilica nvng Italy móngdàn vrvm taq vlwe mvshøl vlwe nøqngøm zùng gvbà rì taq zaqlè wang dìwe vsvng rì covid vgám cìtú dáng shì bøìwe svng dvtvn nø shá dvzvr lvm vchvk we íe.