Vdè rvgaq chøm cúnwángrì gurò nø yàmbvn bvn we vsvngrì dvpat Svrabín koqkámpè Francisò dvtú kà

Vdè rvgaq chøm cúnwángrì gurò nø yàmbvn bvn we vsvngrì dvpat Svrabín koqkámpè Francisò dvtú kà

Vle vmì we lvbán 5 ni taq Svrabín koqkámpè Francis taq kèní Vdè rvgaq chøm cúnwángrì gurò nø yàmbvn bvn we vsvngrì dvpat shvngøt dvtú we kàru tvnùng bøà we íe. We tvnùng kàru ò kà vgo nø "nøngmaq shvngbe we tvnù mànggá svng" wa tø shì we íe. Svrabín koqkámpè Francisí dvtú we taq chøm døngku vrvm kaq shvngømré kèní màbóngwe tvrà rì taqkèní tubùmā kélvm svng dvkám we íe.

Wedø wáshì we nø shvngbe nø tiqnøt tiq mvyùng wawe vjú svng bung dvzvŕ we ínø nøngmaq shvngbe nø tiqlòng taq wa íshàe wawe jejú lòng taq vzømì we íe wae. Wedø íwetaq wa shvngbe nø vrvm vrá daqì weí tiqgø nvng tiqgø nø vsvrvm we mvvl nø téwa shóngnøt taq vzøm lúngìe.

Yadang svng shvngbe vzøm we kùngà taqkèní chvpdap bvnlì walvm íwe svng tvnùngvtnà. Yalòng bvnlì taq Svrabín koqkámpè í dvtúò dø tiqdvchá Media shvngkà daprì ò dvbangshì we, shvngkà dvkangā we , paqzí dvkøm we taqkèní shvlá vtang wàlvm íe wae. Yalòng bvnlì nø 1914 nøng kèní pvng shì ráì we ínø denøng taq nø 107 boq svng gøm ráì wegø íe.

Yani wáshì we ò àng manggá nø yadø vdè rvgaq svng gur nø yelshì we mø:íni yàm bvn bvnvmwe rì nø dang àngpvn pvn rat bøn dvzvŕ òe. Mvjàn rat, dvjáng zønli rat mø:í ni shvnip shvnvrò we vhømò we rat wedø íwe shìwvt rì mèpvng kaq mvbøn lvm dvpat paqzí dvkøm we manggá taq wáshì we íe.

We ratnø shvngømré vdòng taq wedø gvray àng nvng vbóng dø pvnmvn vsvngrì dvhø tasvng roqgvrā ké lúnlvm dvpat tasvng vjú røtā kéì we taqkèní gø dvzaq dvkángshì lvm dvkám bøà we íe.