Vgo dvtut we cvmré bvrácè 2 gø svng Vatican zírúng taq shvla dø ngélún bøawe

Vgo dvtut we cvmré bvrácè 2 gø svng Vatican zírúng taq shvla dø ngélún bøawe

Zì paqzí taq kèní gvzà yake wanø shønlvm vrvmwe 2 nøng íyámìwe svma svrécè 2 gø nø vgo dvtut nø bvrácè íwe íe. Àngní svng vle:ámì lvbán taq Vatican Bambino Gesu zìrúng taq zì svrawon 30 gøí June 5 .2020 ni taq kèní 18 nari naqhoq ngéò we svng jòrdø wálún bøa we íe.

We cvmré gønínø Africa móngdàn taq kèní ínø vgo mèpvng lvpmø dvtut we mvtaq shvwi tvrà mvme gø mvngu shìwe íratnø vtang shaq rvzaq weí rvtø 1nøng dángte zìrúng taq ngélún lvm dvzaq shìbøì we mèpvng nø jòrdø ngélún bøanø cvmré gøníò lvpat shiqshàn tvrà gø nøt bumlvm mvl wanø svrawun mvdò taq kèní tvnùngvtnàwe íe.

Cvmré gøníò àngmè taq kènígø zìsvrawun rìsvng gvzà oqà wawe ínø Svrabín koqkámpè wvl taqni cvmré gøní svng tìløp zíshì lvm dvdamòe wae. Cvmré gøní nø  Ervina nvng Prefina ínø àngmè nø Ermine wa tøshìweíe. Àngmè shøn we taq Africa móngdàn taqni vlwe ínìnø kadø bønlongwe svng dvdam mvrøn shì yadø zì dvbana bøawe svng gø vtang shaq dvbùwe ínø cvmré gøníò lvpat taqøgø mònggàn taq zìpaqzí taq kèní vsvngrì svng dvbana lúnwe cvmrérì bønlún lvm dvdamòe wanø shøne. Yalòng shvngkà svng Aleteia shvngka kèní shálúnshì we íe.