" Vm aq vnatshì rvtø nø Gvray kaq svng ngà:ng we tvrà tiqlòng íē."

" Vm aq vnatshì rvtø nø Gvray kaq svng ngà:ng we tvrà tiqlòng íē."

Svrabin Koqkvm Francis nø lvban vshøm nī wàqpúí mvtshì we boy kàgvp nóng we Missa svng Shansherpè. Piter noqngøm zōng chømmè taq wàbøā nø rvzvngcerìí vm aq vnatshì rvtø svng Vpè Gvray, angcepè Gvray nvng Shansher we Pvlace Gvray kaq lo we tvrà tiqlòng ku dvdut nø vtōshì lúnlvm dvkvme. Shvngømré kèní Shansher we vm aq vnatshì rvtø svng pvngshì weò Svrabyin Koqkvm Francis ínø wàqpú svng shvmàno nø lvban vshøm nī wàqpúí mvtshì we boy kàgvp Missa svng wàbøā.

Svrabin Koqkvm Francisò Mòngkà taq "vm aq vnatshì rvtø nø Vkangpè Gvray kaq svng dì we tvrà tiqhø'ng ínø angnvm angchvngri mvdvmø gvlshì we shóngnønt svng téwa dvdvm røtlvm rvtø-shvlá tiqlòng íwe dāng" dvkvme. "Gvrayí nø àng mvrdvng yv'ng svng vrá tiqkvt vtvng lvm rvt nøngmaqò nønt mvsøn shvngbè svng røtshì we vlē. Yà rvtø taq nø nøngmaq shvngbè, Gvray móngdàn tøngnømè svng tuqlúnlvm tvrà svng lalúnlvm rvt nvng ídvngté shvngbè mvdvm taq vl-we Gvray nvng nøngmaqò vpø rvnaq we lvpat svng lalúnlvm nøngmaq cunshàì we lvpat svng dvdvm nø daklúnlvm rvtø íē.

"Vshùq lvpat taqkèní lutshì lúnlvmrvt" Nøngmaqò lvpat kadø cunshàì we dāng nvng Gvray kaq nøngmaq dìì we tvrà taq døngngang dø kadø wà dìì we dāng daklúnlvm rvt rvzvngcerì svng dvkvm bøì we íe. " vm aq vnatshì we tvrà nø vshùq lvpat taqkèní lutshì lúnlvmrvt búnglòng íē." Cunshì nø èdì we lvpat taq nøngmaqò vlē yv'ngì we laqyà mvgàm rì nvng mvdøng mvman dø kvm vdù ya:ngìri svng vrá tiqkvt vléshìlvm rvt tiqkvt kvt dvlit gvzam we vhøm vdùe. Íni gø, nøngmaq nø kàdvng baqhøq vlē shàì nigø Gvrayò cunshì we Mòngkà svng lalún weí nøngmaqo gønshaq tvrà svng vrá tiqkvt lalúnshìe.

" Vpè, angce, Shansher we Pvlace kaq svng" Svrabin Koqkvm Francis ínø vm aq vnatshì rvtøò nvmlat dvtvng nø mv-rà vchvngshì we Sacramentu taq vroqshì lòng svng vtōshì weí Vpè Gvray kaq svng vtvng we dāng íe" wanø shønbøā. " Vpè Gvrayí vroqā lòng nø nøngmaq svng rvtø vrv'm nøngmaq nø nøngmaqò hí taq vrá tiqbaq rip lú:nìe" wā shønòe. Nøngmaq nø vkangpè Yesu kaq vwvngshìlvm Vchvknge. Vkangpè Yesu kaq jèjú vtvnshìlvm rvt vtvng ráí we mvnggvng zøt nàí zā pè dø nøngmaq gø vkangpè Yesuí dvbān lòng vtōshì lúnlvm rvt gvzà Vchvk ngè. Nøngmaqò zā yv'ngrì svng vkangpè Yesu kaq shún nø, vkangpèā ngào mv-ràri, nønt dvshà mvhøt vhømlvm rì nvng tiqdø vkangpèo mvrdvng taq tuqbònga. Vkangpè nø cì svrawøn tiqpè èíē. Vkangpèí nø nvcepè ngà svng shvlut èlúnàē. Nvcepèo nønt mvsøn shvngbè svng shiqshàn dezvrà" wanø røt nimshìlvm Vchvk ngè.

We mèpvng Svrabin Koqkvm Francis ínø " nøngmaq nø Shansher we Pvlace kaq vwvngshìlvm rvt gōē" wanø dvkvme. Wàqpú svng vgo mvdvmø mvtshì lòng nø nøngmaq nø vbà dvtøl íshà we svng shvdøm lòng íē. Vbà dvtøl kèní Gvrayí nø Shansher we Pvlaceo gønshaq svng zàngà yàngà. "Vrv'm vrá nø vzøm we" Nøngmaq nø Gvray kaq svng lolvm tvrà dāng nø Gvray nø nøngmaq kaq svng nvmlat dì lòngì rvt íe, wanø Svrabin Koqkvm taq kèní dvdvm dvzvrè. Vkangpè Yesu nø nøngmaqo mv-rà nvng shìlvm lòng svng vtobøā rvt " nøngmaq lvpatnò tvrà rì svng gø vkangpè àng wūr taqkèní èshølrì we dāng íē.

" Gvrayí go we svng nøngmaq vtōqshì rà we taq Svrabin Koqkvm ínø nønt mvsøn vdòngø shòshòwà vrv'm vrá lv'm wanø shøn we taq bvnlì nvng svkse wáshì nø dvtanlvm rì vbáè. "shóngnønt taq angcø angce" Lvngdøm taq Svrabin Koqkvm Francisí vm aq vnatshì rvtø nø Gvray nvng nøngmaqò angnvm angchvngri kaq shvrúng nø dì we rvtø íwe dāng dvkvme.

" Chutchvng lòng nø ngør dvgúng svng ngà:ng lòng mø-í nø shóngnønt taqkèní búnglòng íwe dāng" vm aq vnatshì rvtø nø nøngmaq svng dvdvmshi nø cíng dvzvrè. Kàdvngté nøngmaqí mv-rà wá vléì nigø chutchvng we ìshøt zìwe hkristuo wurgvng tvrà kaq svng kadvgvp gø vtvng lún nø , àngò dāmmarì taq nøngmaq shaqcvmi nø mv-rà vlé shàìrì svng dvdvmshi nø vnatshì shvlāe. Welòng dāmmarì rì svng rvnaqdø yvnglún weí nøngmaq nø lvpat nò dvshà mvhøq vhømlvm yv'ng kèní Gvrayí nø àngò shøn mvtvmshi we mvrézā nønt ní nøngmaq svng vlømshi we dāng nøngmaqí cíng lòngìe." wanø lvban vshøm nī wàqpúí mvtshì we boy ò Mongkà svng lvngdøm dvtømlvm bøā we íe.