"Vm aq vnatshì rvtø nīlā taq vkangpè Yesu gvl yàngà we rvgaq kèni Francis gin ri wurgvng gvwvn we dang "

"Vm aq vnatshì rvtø nīlā taq vkangpè Yesu gvl yàngà we rvgaq kèni Francis gin ri wurgvng gvwvn we dang "

Shansher we rvgaq wanø tøò we vkangpè Yesu gvl yàngà we rvgaq taq vl we Catholic sasvnao chøm dvrērì, shvràrì svng ròqgar lvm rvt sasvna kèní Francis gin mvdò svng bvnlì zíbøā.Wervt angmaq svng Shansher we rvgaq svng ròqgar gø' wā shvríngò nø lángòē. Vm aq vnatshì rvtø nīlā taq Catholic Shvngømré rì nø Vkangpè Yesuo wurgvng tvrà svng Narni vrvm gvwvn nø vjúrøt we vlē. Wervt vlē a: mì we rvtø kèní pvngshì nø vm aq vnatshì rvtø wurgvng tvrà svng vjúrøt shì we zaqle rì nvng tiqdø dvríshìlvm rvt pvngshì bøì. Íni gø Covid 19 yóga Zønlì vsher yùl rvt vjúrøt shìwe zaqlerì ígø dì mvlúnò. Wervt vlē a: mì nøng dø chaqdvp dvtvnshi we mà-vl. Wervt nvmbøng Shvngkà taq kèní tiqdvtvng dvshvng a:lvm íē. 

Shiqshàn tvrà dvjà ku Vkangpè Yesuo hímàl  wurgvng tvrà yv'nggúng svng cvndvgøm mvlún rvt ngà nø vcar ngè wā vtō shìwe mø-í dø vdè shvnvngø vl dø kvmlvm rvt online paqzí dāng kèní dvshvng shì we íē. Wervt vm aq vnatshì we rvtø taq"lvban bunga"ni nivrvm vkangpè Yesu ngá:ng yàngì we Yeruslem kèní Gogōtaq shigung wurgvng tvrà svng dvtvnlvm ídaqē. Vkvtdø dvgø'shìwe mvtú nø vlē a:mi we (2020) nøng vzv'ng kaq vkangpè Yesu dvshá mvhøt vhøm yàngà we dāng dvdvmshì nø cvndvgøm lvm rvt íe.Yalòng wurgvng tvrà svng cvndvgøm nø dènilā mònggang taq vhøm shìwe dvjà, dvshá mvhøt lvm rì svng vlømshi nønt ní shvle lún lvm dvbushang Mòngkà gálòng svng zílúnlvm rvt íe. Zun bōyo dvbushang Mongkà íwe dvshà mvhøtlvm vhøm we, Shi we mèpvng vrá tiqkvt zunlvm vlē. Wē pà dø mònggangò dvshá mvhøtlvm lòng svng shvlē bøò mèpvng mongzøl we rvtø tuqlong we íē. 

Wurgvng tvrà (13) shvrà svng Shansher we shvrà taq Bvnlì rì we Francis gin doraq rìí  vdè è-vl we shvrà kèní dvdvm nø cvndvgøm lvm mvtúrì svng zílvm íbøì. Yadang svng video hàng taqkèní dvtvn lvm íbøì. Yalòng video hàng svng dvlú vtìmp Shaq íē. Nivrvm dvdvm nø cvndvgøm we dang svng zì we doraq mvdò nø siria móngdvn, Yeruslem, gvrík, Dèlābī , Isre móngdvn rì taqkèní ínø we rvgaqò dvjà yvnwārì kèní dvtvnshì we íē. video ò lvpat mvshøl kàrū svng English, Tamil (India),  dāgvlú(Philippines), Ja man, Italy,spiang nvng mvndvring (miwa) pvn kàrì taq kèní dvtvn lvm ílongè. nivrvm vkangpè Yesu vl yàngì  vlē a:mi we(2000) nøng dvgvp vl yàngì dì yàngì shvrà rì svng chaqdvp dìm nø dvtvnòē. Video dìm we taq pvlace tvrà nònggwøn lùshì lúnlvm dvpvt sømla rì, hàng rì, dvjà yvnwārì mvmè taqkèní dvtvnshìē. we shvrà rì nø dvbushang Mongkà búng we shvràrì nvng vbóng we shvràrì íē. 

Yalòng tvyøò bvnlì angkang doraq mvdò taqkèní móngdvn vrvmø Covid vgám cì túò we ínø  (2021) nøngò  zunboy nø àngwa nøng dø mø-í nø Shvngømrérì gø mvmè dìlvm vlømshi we dāng, Covid 19 vgám we cì tùshì we dang gø Shansher rvgaq taq gø pvngshì bøì we dang,Ínigø vyáshì nø dvgø'shì rà we dāng, vjúrøt shì we zaqlerì mvdì we dang nø Shvngømré chepku zā we mà-vl we ínigø móngdvn gòng we Gvmsùng taq gvzà zā wē dāng, pàwálvm wanì bvnlì angkangri téwa nø batdvlínhèm nvng Yeruslem myoq gvbarì taqkèní bvnlì angkangri bvnlìrì svng nar vdù bøì.

Doraqri taqkèní vjúrøt shìrì svng dvleālún we nø vdè vjúrøt shìnø shvdik shì we Noqngøm zōng nvng Shvngømré boy rì svng vjúrøt we rùng taqkèní rvtø vrv'm dvshangà we dāng íē. Vkvtdø vdè taqkèní dì mèlúnò we ínigø vjúrøt shìrì svng yv'ng nø vdè gø Pvlace kvmnønt nònggwøn lùshì lvm dāng, vjúrøt shìwe zaqlerì taqkèní rvtø zì we lā-vl nìnø vdèo kvmnønt bung we shvrà rvgaq svng dì Shvla we dāng, Shansher we lvban vdòngø zunboy nvng singdø Shansher we shvrà rvgaq íwe vkangpè Yesuo vnàng rvdāò we shvrà, chutchvng we tvrà svng dvgøò we jesemani cún kùr-wang rì svng chaqdvp dìm dvtvn lvm ídaqē.