Vsak shi màrvm we rìkaq tùbum dvbangwe rvmánzøng

September 16-18 ni taq Svrabín koqkám kó taq vlwe vsak shi màrvm werì kaq vsùngò we mvdò mvngu shìnø dvmàn we wàbøà.

Welòng zupùng taq Roma kèní gvsarì nvng online mvdàm kèní gvsa tiqmaq nvng vràshì we svng shálún shìe. Yalòng commission svng 2014 nøng March shvlá taqkèní Svrabín koqkámpè Francis shølshú vgo wáshìnø poqpvng bøà we íe. Yalòng zupùng dáng bøà kat shvngkà daprì kaq vtànòwe taq yanila covid 19 yóga zønlì vkøn we rat nø Commissionò bvlirì svng online taqkèní wa wávdu ráì we írat bvnlì nvng singnø gùn dvtøpwe, paqzí ziwe bvnlìrì walvm dvkám bøà we íe.

Vsak shi màrvmwe vsvngrì kaq vsùngwe commission taqkèní vsak shì màrvm we dvshà mvhøt lvm vhømò vsvngrì kaq vtoq vtip nø tubùm dvbangwe bvnlì wàò we íe. Wedø íwe vsvngrì kaq vsùngò nø dvbangwe nvngòn zi, paqzí ziwe bvnlìrì wàò we íe.

Brazil móngdàn taq gø wedø vsùngòwe bvnlì wàò we svng rvmánzøngcè tiq lòngku wá pvngshì ráì we íe. Wedø wápvng shì ráì we taqkèní tøp tøp wa vjúzi dø wálún shì ráì we svng gø shálún shìe.

Pazí cvn-awe nvng vsùngò we dang

Covid 19 yóga zønlì vkøn we rvtø chøm dvgø màdá cvmrérì nvng vsvngrì kaq tubum dvbang shàì wanø online shvngkà kèní gø vring bøà we íe. Wedø wáshì we bvnlì svng zvn dvtøt mèpvng kaq gø wá vdue wanø commission kaq svng paqzí we kà we lípùng taq vbá we vsvngrì taq kèní tvnù bøà. Yadø wáshì we tvnù mangá nø yani la taq dvshá mvhoq vhømò we vsvngrì nvng shvnip shvnar vhømò we vsvngrì kaq gùn dvtøpnø online taqkèní gø dvshvng lvm íwe svng shálún shìe.