Vsv̀ng shatwe bv̀nlì sv̀ng kagǿí gø mvwàlv́m svrabín koqkámpè Francis í Mongolia bukdaq pùnggyì rì svng dvkámwe

Vsv̀ng shatwe bv̀nlì sv̀ng kagǿí gø mvwàlv́m svrabín koqkámpè Francis í Mongolia bukdaq pùnggyì rì svng dvkámwe

Svrabín koqkámpè taqkèní Mongolia bukdaq pùnggyì rì nvng Vatican taq vhømnø̀ dvmv̀n bǿì we íe.  We lìpùng taq vsv̀ng dvcìrì shvngbe vdòng tasv̀ng shat kewe bv̀nlìrì ka shvrà, ka rvtø̀ taq ínìgø mvdøng mvdaq gur ràwe dang nv̀ng mòngzøl we tvrà sv̀ng zǿmshì lv́m dvtúnø̀ dvkám ràwe dang shvngø̀mré vrv̀m vzø̀mwe mvdò kaqsv̀ng dvkám bǿà we íe.

Vatican móngdàn nv̀ng Mongolia móngdàn dvhø̀ gvsa krønmvng ku vzø̀mwe nø 30 nǿng gøm bǿì we ínø̀ we ni lìpùng mè taq Asia dan bukdaq gvsarì mvdò nv̀ng gø vhømnø̀ dvmv̀n bǿì we íe.

We gvsa mvdò rìnv̀ng Mongolia móngdàn shvngø̀mré angké róng Apostolic Prefect íwe Svrado Bishop Giorgio Marengo kèní govt nà wegø íe.

Svrabín koqkámpè Francis taqkèní gø Mongolia bukdaq pùnggyì rì sv̀ng pàmvrà wanø vpǿ we nøtkèní vtoò nø̀ Catholic shvngø̀mré nv̀ng vzø̀m vzvp vtoq vtip nø mòngzø̀l we tvrà svng vrang lv́m shvrúng nøt vlwe dang Svrabín koqkám pè taqkèní vpǿ shvring we gø íe.

Cømsaq mòngzø̀l we tvrà walòng sv̀ng dèni bat vsv̀ng dvcìrì shvngbe í jøng jøng ni shóngshì nø̀ caò we tiqdang gø íe. Yalòng sv̀ng vrang lún lv́m dvpat vsv̀ng dvcìrì vrv̀m dvhø̀ vhømnø̀ dvmv̀n we wá ràwe íe. Toniò mònggv̀n dvjà svng vré shìwe nvng angdang dang taqkèní mvgvm màshvla we bv̀nlì rì sv̀ng gul lúnlv́m rat shvngbe nø vhøm nø dvmv̀n we wá vdue.

Yadø mvgvm màshvla we bvnlì warì sv̀ng nonggwøn zíò vsv̀ngrì kaqgø nøt yùl we dang Svrabín koqkámpè Francis taqkèní dvkám nø shvdǿm bǿà we íe.