World Blood Donor Day

Mòngàn taq nøng vràm June 14 ni taq wá vduwe mòngàn shvwi alu ziwe àngni nø mòngàn taq svre dvkéwe nvng shvwi nvng singwe dang taq téwa síngshá lún lvm dvpvt shvwi alu ziwe vsvngrìò lvpvt chángwe tvràrì svng vpø shvring lún lvm dvpvt íe.

Vsvng shvwi nø záyàng zìzi we dang dvpvt gvzà vchyak we íe. Lvpvt chánglúnwe dang taq gvzà tùbumshìwe mvtaq svng tiqgøò lvpvt svng gø téwa yang dvzvŕwe íe. Za vsvng tigø dvpvt shvwi nvngòn dang luqpøn dø tùbum awegø gvzà vchyak we íe.

Wedø íwe taq vdè móngdàn vdòng taqø gø shvwi ãlu zi we dang dvzaq shàìnø luqpøn lvm vchyak weíe. Íwe móngdàn vrvm taq yadø íwe dang shvla dø luqpøn dø lúnshì lvmnø gvzà rvzaq wegø yánglúnshìe.

Shvwi zíshì shvla werì

Vsak 18-65 nøng dvhø taq vl we vsvngrì taq kèní shvwi alu zíshì shvla we íe. Shvwi zíshì we rvtø taq góngshiq shvn tvrà vl lvm gø vchyak we íe. Zaqlèwàng èdi:vm dvgvp gø zvngwa shvwi alu zíshì mvdaq. Pàwálvm wa ni kaqlì, puqwaŕ zønlì dø íwe àngpvn pvn vlsháshì we íe.

Mvshiq shvnwe svmaré nvng evl bø mèpvng 12 shvlá vdòng nvng vrùra pvn shvwi vdòng taq túshì bøwe mèpvngø gø shvwi zíshì mvdaq we íe.

Cvmré góngíwerì nvng cvmré nong dvcøqshì we rvtø taq ínìgø shvwi zíshì mvdaq.

#source-rvawebsite