World Heart Day

Yani bøn ráìwe mvtú nø 1998 nøng béráì rvtø taq mònggvn vsvngrì angdè nø angdè shvtshì we svng vgám we mvdòrì nvng dvmàn nø mvngushì bøì mèpvng bønráì we íe. Yani svng September shvlá lvngdøm lvbán taq lvbán ni svng mvsat lvm mvsatshì yàngì we ínìgø 2000 nøng vhøm ráì mèpvn nø dèni September 28 ni taq walvm nøt vrá yàngì we íe.

Yalòng svng WHO, UN nvng UNESCO mvdò rì taqkèní vsvng nvrøm nvng singwe yóga vgámwe svng vpø shvringò we ku taq kèní waò we íwe svng shálún shìe. Yani svng mvsat shìbøì we angni 2000 nøng September 28 ni taq nø mònggvn gønsøp dvløt bóy Australia móngdàn Sitani myoq taq waò we angni nvng tiqni vdòng taqni wá vdu yàngì.

Weni taq vsvng nvrøm nvng singwe angké gomidi rìkaq Spain móngdàn gvmzø koqkámmè Sophia nvng mònggvn gønsøp dvløt bóy gomidi vgopè Juan Antonio Saaranch taqkèní tùbum dvbangwe taqkèní yani svng walvm vko vkáng zíbøà we íe.

Yani svng Barcelona taq bóy lìpùng gvbà wàlúngà we ínø Mediarì taqkèní mònggvn svng vring lún yàngà we íe. 2001-2002 nøng dvpat mvdøng kà vgo taq nvrøm yóga, nvrøm shvwi dvjù nvng singwe yóga vgám lvm wawe mvtaq vsak lvpat vràm dvpat vchyakwe svng tvnùng yàngà we íe.

2003 nøngò kà vgo nø svmarérì nvng nvrøm yóga wawe ínø vlù vlàngrì svng tvnùng bøà we íe. Mèpvng kaq nø mònggvn nvrøm yóga angni World Heart Day yalòng svng móngdàn vrvm taq wáshì lúngì. Yaniò bóy svng vsvng màngpòng mvdòrì vzømnø cìróngrì, paqzí zùngrì taq lvmwe, gønsøp dvløtwe nvng dvtan werì angpvn pvn wàò nø wáshì we svng yáng lún shìe.

Yabóyni svng vsvng mvnpòng mvdòrì, dvsházà bvnlì wawe mvdòrì taqkèní tùbum shìwe taqkèní shvlanø jòrdø wálúnshì ráì we íe. Yalòng nø vsvng mvngpòng mvdò rìnvng shiqshàn mvdòrì taq vzømnø wáshì lvm tiqlòng gø ínø mònggvn móngdàn vrvmò vsúyaqrì nvng vzøm we taq wáshì lvm gø íe wae.

WHF nø yalòng svng wáshì we taq shølshú gø ínø vháng mvnshìwe móngdànrì taq bønwe góng vzøm shìwe nvng nvrøm yóga taqkèní shìwe vsvngrì mvdàm téwa dvdam shì ráì we gø íe.

Yaniò tvnù mangá nø svngpvn dvcìrì dvhø taq øpshú vsúyaqrì nvng vzømnø shiqshàn dang taq téwa shvladø roqgvr-ã lvm nvng shiqshvn dang taq kèní vsvng lvpatrì chutcháng lún lvm íe wae pàwálvm wani vsvng lvpat wawe nø ringnø vpø vtang íwe svng dvkám nø shvdøm lúm lvm dvpat íe.