Chøm shúnwángrì taq kvt:ámì we kanyúrì taq zánglvm သဘာဝမြေဩဇာ wawe tòniò nvm bøn svng yúl vtvng kadø wá shvla we dvng

Chøm shúnwángrì taq kvt:ámì we kanyúrì taq zánglvm သဘာဝမြေဩဇာ wawe tòniò nvm bøn svng yúl vtvng kadø wá shvla we dvng 

Kanyúng døírì chømsún rvmárì taq katnámì pvnrì taq záng shvla we tòniò nvmbøn ti pvn wa lvm taq nungwàniq tiq joy nvng kaniq tiq joy (svri niq) lún shìninø téshvlae we lòng sàng sømban baba wacè íwe taq mvcheq nø gobóng mø:í ni plastic póng taq vti 8 gallon zángò nø shømni høq èzø bøò mèpang nungwàniq nvng kaniq mvcheq lòng svng ecè òdángí àngti lòng nø nvmpøn shvlá bøn bøì we íe.

Welòng nvmpøn tií ekvt bøò we vyúng rìtaq eshoŕàò we ígvzà shvla we íe. Mvnga svp døí we vyúngrì dvpvt nø nungwàniq tiqpvn wa taq kèní gø wá shvlae. Tán tiq pvn nø nø bogashi wawe nvm pøn wa shìwe dvng svng tashì lvm waì. Bogashi nvmpøn wa shì we dvng taq nø EM ဖျော်ရည် wawe nvmpøn wa shì we taq lángò pvn tiqjoy, Jandvga tì mø:í ni tøngnyet tì tiqjoy svng vti 98 dvtàng zángònø vshú bøò we taq waqcì mvniq tiqjoy, nùngwà niq mø:í ni kaniq mø:í ni waqniq tiqjoy, nvng vmchím tiqjoy mø:í ni shøngbin waqcì tiqjoy záng vshúshì bø mepang rvgaq nvng vshú vniqa rae.

We dø rvgaq nvng nàshúò we taq gvzà shaq we mø:í dø 35-40 yàwet dvhø shaq hoq vshú vniq arae. We mèpang nvmbøng mvgòng dø mvcheq dángí nvmí mvkáng nø shømàyø kéò we shvrà taq gvl ràe. 4-5 ni í:vm dvgvp àngò vkatshì we shvdang sàng dvløt nàràe. Gvzà vkat shì we íni 10 minutes dángte poqò nødègwitò. Bogashi nvmpøn shvng 10- 15 ni høq naq bø mepang nø láng shvlá bøì we íe. Bogashi nvmbøn svng 6 shvlá naq høq gvlshva we íe. Bogashi nvmpøn svng rvmá 1ecra taq 20 bùrì zángshì we íe.

Bogashi nvmpøn nø toniò nvmpøn íwe taq kvtvm we bvnlìri dvpvt gvzà shvla we ínø vjúzì we nvmpøn tiqlòng gøíe. Mè pang tiyø taq nø EM ဖျော်ရည် wawe nvpøn ti waò we dvng svng vrá tashì lún lvm ílonge.