Kvtvm we tvmø bvnlìrì taq dvt nvmbøn lángshì we taq kèní tòniò rvgaq nvmbøn tìn we tvrà

Kvtvm we tvmø bvnlìrì taq dvt nvmbøn lángshì we taq kèní tòniò rvgaq nvmbøn tìn we tvrà

Mòngàn vsvng shangbe nø rvgaq tøm mvdàmø vlìnø cúnshàì we mvtaq katnvm tvmø bvnlìrì wa:ámì we taq kèní dvkómshàì we íe. Rvgaq tømnø nøngmaq svngpvnrì dvpvt dvpø shvdún mvdángshì we vjú ziwe ínìgø rvgaq tøm vsvngrì taq kèní àngsvng shvla dø vjúzí mvwá shàì we svng yánglúnshìe.

Katnam tvmø wa:ámìrì taq kèní rvgaq tømø nøng vràm shøng, kanyúngrì kat:ámì we taq kèní tòni rvgaq nàmbøn taq mvngushàìnø dvbéì we íe. We døí we nøng vràm kat:ámì we taq tòni rvgaq nàmbøn bélúngì we í dèni bvt taqnø dat nàmbøn svng láng vduráí we svng yánglún shì we íe. Svngrì taq kèní tòni rvgaq nàmbøn svng garnø mvkok we dvng taq gvza nvngòn yúm we svng gø yánglún shì we íe. Tòniò nàmbøn bewe dvngrì taq nøng vràm kat:ámì dángí nàmpøn vrá mvzángì rvtnø, vtìí kéò rvtnø, rvgaq sórì vdòng svng gòng:am rvtnø, rvgaq àng datrì vshúngnø vmang:am we rvtnø íwe svng shálún shìe.

Vháng:ámì móngdànrì taqnø katnam tvmø bvnlìrì nvng sing we gùntvtøp we paqzí zìdang rí vháng:ámì we ínìgø vdè Myanmar móngdàn taqnø we døí we paqzí dang rìtaq nvngòn yúm we svng yánglún shì we íe. Tòni rvgaq nàmbøn bélúngì nø tin we svng vdèí èkatnò we shøng, kanyúngrì sang èyàngò nø gø shálún shìe. Vdèí èkatnò we shóng, kanyúngrì tiq nøng mvdàm tiqnøng todø shvla we zìdvng mvlúnshì lòng bøn we íe. Wedø ílong rvtø taq todø shvla we zìdang lúnlvm dvpvt dat nàmpønrì svng láng sháìe.

Dat nàmpønnø èkatò we shøng kanyúngrì dvpvt shvlá lunò we vjú ziwe ínìgø tòniò nàmpøn svng shvtinònø rvgaq mvgòng dvzvŕò we mvtaq vsvngrìò góng shiqshàn lvm dvng svng gø mvtøq pvla pøn sháò we svng síng shá dvzvŕ we íe. Wedøí rvtnø vpøì we pè mè vnvm vchang maq làngchà nvng vdèmóng tòniò rvgaq nàmpøn svng shvla dø roqgarì nø mvkokì we taq Dat nàmpøn døí we rvgaq tin sháò pvnrì láng vyá shàìnø tòniò nàmpøn svng lángì we taq kèní vdèò rvgaq svng roqgar shàì wangnø မောင် ချမ်းသာဦး ívru bøà we svng kà tvlíngò we shvngkà yayáng naròe.