Mongan mvniq rvme ni

Mòngkàn mvniq rvmè àngni

Mòngàn vsvngrìò cúnshàì we lvpvt taq shiqshàn lvm tvrà svng dvdam lúngì dvgvp mvniq rvmè dvpvt dvdamà mvsháì. Ínìgø mvniq rvmèò shiqshàn we nø nøngmaq svngpvn dvcìrì dvpvt téwa vjúzi we íe. Dèni rvtø høqshaq paqzí vdèrì taq kèní dàlvm døí we mvtúrì svng yàng màdat gún dvtøpmò we íe.

We dø wá dvzaqshì lòngò mangá nø mòngàn mvniq rvmè àngni dvpvt téwa vjúzí lún lvm dvpvt gø íwe svng yánglúnshìe. Mvniq rvmè nø nøngmaq vlì we mòngàn yachàngò bvshú íe wanø tø íwe mòngàn dvpvt shaq (oxygen) zíshú gø íe. Mòngàn mvniq rvmè ni gvĺshìwe mvngánø svngpvn dvcìrì nvng mvniq rvmè nø tasvng kadø wa vjú zi kelòng svng síngshá lúnlvm dvpvt, svngpvn dvcìrì shvngbe nø tiqnøt tiqmòng wáshàì taq kèní mòngàn mvniq rvmèò shiqshvn lvm dvng svng roqgvr lúnlvm dvpvt íe.

Àngnø mòngàn vsvngrìò vm:aq lvm nvng zì dvshi rì zíshú mvdøng íwe mvtaq tì vdòngø cúnshì pvnrì luq vtang vshøp we shvrà gø íe. Mvniq rvmè svng dvng àngpvn pvn taq kèní vréshì we vdòng taq àngsvng shvla dø tvtut cúnshì lún lvm roqgvr we vsvng vl lvm gø gvzà vchyak ráì.

Ya mvngárì shvngbe taq kèní UN mòngàn mvniq rvmè àngni 2020 nøngò kà vgo nø "mvniq rvmè lvpvt yangúng cúnshì lvm tùbum shàì" wa we íe. Dèniò mòngàn mvniq rvmè àngni mvsvt dønsvt svng Oceanic Global nvng vzømnø wàò we svng gø shálún shìe.

Yadø waò we lòngnø mònggàn mvdàm taq dvzøp shàì nø dvgø shì rà we dvngrì téwa wá dvgøm lúm lvm nvng paqzí àngshárì mvn lúnlvm svng tvnùngshì we íe. Dèni June 8,2020 nøng mòngàn mvliq rvmè ni nø 2021_2030 nøng dvhø mòngàn rvdoq UN ò mòngàn mvliq rvmè nvng sing we paqzí vdè rìsvng tùbum shì lvm svng tvnùngò we íe.

Yalòng taq kèní mòngàn shvrà kayáng mayáng vl e paqzí vdèrì dvhø vzøm nø té wa shvla dø dvng vlíng vpoò lòng svng tùbum lúnlvm dvpvt íe.