Nvnggwa rì pòrlàng taq yóga bø'n we

" Nvnggwa rì Pòrlàng taq Yóga bø'n nø Shì we "

Vpø íwe vnvmchvngmaq Dèni lvmang tvyø taq nø dènila Putao gwørwang me vdòng Nina rì taq vkøn we zønlì dvjang rì dang tiqdòngce dvshvng lvm íe.Dènila Putao gwørwang me vdòng, mvring vrvm taq nvnggwa rì pòrlàng taq yóga bø'n we svng shálún shìe. Dènila Lungsha Yang mvring taqgø nvnggwa rì pòrlàng taq yóga bø'n nø shì we shvngkà svng gø shálún shìe.

Putao myoqnē Lungsha Yang mvring vdòng taq nvnggwa rì bòrlàng taq yóga tiqlòng vkøn nø bø'n weí nvnggwa rì shìe, wànø mvring Vsvng tiqpèí shønò we svng PNG Shvngkà tvyø taqkèní gø shálún shìe.Lungsha Yang mvring taq bø'ng mvsháshì we yóga tiqlòng vkøn nø nvnggwa (4) gō yanila vdòng taq shì bø'ì. Wèwā mv-taq Putao myoqnē mvring vrvm taqgø nvnggwa rì bòrlàng taq bø'n we yóga tiqlòng vkøn nø mvmè vshér we svng yv'nglún shìe. 

26 Jun 22 ni taq bòrlang taq yóga bø'n rvt shì bø'ì we nvnggwa tiqgō svng mvring vtv'ng lvp svng shà:lō nø lùpa:mà, wànø Lungsha Yang mvring vsvng tiqpè í shønòe.Putao gwørwang vdòng Vkvt dø Nina rì taq gvzà shvrē dvké we bøng mvsháshì we  bòrlàng yóga í shì nø vshér we rvtø taq nvnggwa sha rì nvm we, wvnvm we vyáshì ràe, wanø Paqzí dvkøm nø dvshat we vlē.

" Vkvt Nina rì taq bø'n we yóga lòng nø vshér yòr nø shì gø gvzà lvwvn we yóga tiqlòng íe, wàe. Nøngmaqí mvsháì we shvra rì taq gø shí vdùe. Nvnggwa sha vwuò nø nvmō we shvngkà rì gø tálúnshìe. Wervt mà-shá yv'ngkèní nvmlúngò we nvnggwa sha rì mvwvn kélvm vyáshàì, wànø gø dvkvme.Vrá nø, Putao myoq vdòng Jun shvlá 13 ni dvgvp bøng mvsháshì we bòrlàng yóga i zā we nvnggwa tiqgō Konggvtōng wàl tiqlòng taq yv'ngshì bø'ì mèpvng nár(2) nár mèpvng mvring vrvm taqgø vshér nø bø'n lúngì we svng yv'nglún shìe.

Putao myoqnē Huku wàl taq gø bøng mvsháshì we bòrlàng yóga i zā we nvnggwa tiqgō kaq Cì lvjàngò we shvngkà gø tá lúnshìe. Vrá nø,Vsvng kaq nø mvgú wanø gø shønòē.
Íwe shóngnønt vnvmchvngmaq vkvt dø zønlì dvjang rì vkøn we rvtø taq nà-yáshì lòng nø Cì gvba tiqlòng gø íe.

Shvngbeí shiqshàn mongzøl lòng vtōshì laqlúnøng. Shvngbe svng oqā.