Rvgaq yachàng svng roqgvr shì we

vsvngrì wáshàì Mònggvn rvgaq yachàng svng dvsháza shóngnøt taq kèní roqgvr shì we nø vsvngrì nvng pvnmán dvrèrì dvhø taq vdu vbóngdø wáshì we íe wanø Svrabín koqkámpè Francis taq kèní vle á:mì we lvbán 3 ni taq Vatican kèní dvkang bøà we íe. Ta svng mvkok kélvm wáshàì Yanila vkønwe covid 19 yóga zønlì taq kèní lutshì lvm dvpat tasvng mvkok kélvm wáshàì. Dvshá mvré íwe vsvngrì, záyàngí vtøp kéò vsvngrì, svrøng á'mì we vsvngrì kaq tubum dvbangshì ràá:mì. Pàwálvm wani ang maq nø vsvngrì dvhø vpø shvring we mvhø:mò we ínìgø gvzà vchyak we dang taq kèní cúnshì we íe. Wedø wáshà ìwe nø mònggvn rvgaq yachàng svng roqgvr shàì we nvng vbónge. Pàwálvm wani cúnshàì we shaq vlì pvnrì shvngbe nø tiq dvgàng taq wa vlì we íe. Gvrayí mònggvn rvpdoq yachàng svng pvnmán bøà mèpvng welòng svng roqgvr lvm dvpat bashà rìsvng pvn yàngà we íe.

Nøngmaq cúnshàì we rvgaq yachàng svng gvzàm nø shvtin we ngàshà taq kèní vgám lúnwe nø síngrál nøt kèní vyáshì we íe. Síngrál nøt kèní vyáshìwe mvl we ínìnø tìnnø gvyaqshì lvm svng vyuq sháò we íe. Bashàrì taq pvnmán dvrèrì shvngbe svng roqgvr nø vsùng lvm vmíng vkáng vzíshaq íe.

Pvnmán we dang taq Gvray shvnshvŕ kàru svng màshvla dø lvchyøm ku lángshì we ínìnø màshvla lvp svng vpo shì dvzvŕ longe.

Bashàrì taq mònggvn rvgaq svng shølshú wáshì nø Gvrayò rúngtang høq shaq vtølwe vsvngrì gø vl ráì weí Gvrayò laqmù svng vréshìnø gvyaqvt nà werì gø yáng shìráì.

Vsvng nøng maqò bvnlì døngjá nø rvgaq yachàng svng roqgvr lvm dvkám shaq íe. Rvgaq yachàng taq cúnshì lúnlvm dvpat dvcøp nø roqgvr shìràe. Roqgvr shàì we taq kèní vmyat lushì lvm mø:í. Dvshá mvhøtwe vnvm vchangrì nvng angmè rvgaq yachàng nø gvyaqshì we vhø:mò we taq ràngshvng wàá:mì.

Wedø írat rvtø vmø-ke dvcøp shàì. Wedø wàì we taq øgø mvdàm ramwa wáshàì we mø:í nø gvray angí vzíshaq íwe dvpø lúnshì we høshaq wáshì lvm vchyake.

Gvrayí pvnmán dvrèrì Gvray angò laqmù rìsvng vpø shvring mvsháò we ínìnø kadø wa mòngzøl dø vdá mvgàm lvm svng mvsíng shávtnò. Gvray angò pvnmán dvrèrì taqkèní vmyat lushìwe vsvngrì nø vsvngrì kaq vshuq dø wa dvdut lúngòe.

Toniò Gvray laqmù svng màpø mà shvringò we nvng vsvngrìò shiqshàn tvrà svng gvyaq lvm vréshì we bvnlìrì vgám ràá:mì. Mvsíng rálwe vsvngrì kaq síngrál lvm tùbum dvbang shàì. Mòngzøl dø vháng lúnlvm zìdang dvhàng lvm wàì Síngrál nøt nvng roqgvr we dang taq wáshìwe vsvngrì nø nøngmaq shvngbeò chyøm svng roqgvr rìíe. Yadø wáshì wenø mèpvng mèyà dvcìrì dvpat vchyakwe bvnlì tiqlòng gø íe. Wedø tiq dvchá tòniò dvrá nvng tóng laqyà zaqshøprì svng roqgvr we vsvng mvdòrì kaq svng gø oqà wáràe. Pvnmán dvrèrì kaq svng roqgvr lvm nø nøngmaq gø vrvmò bvnlì døngjá èíãìe. Nøngmaq mvngushàì we chøm rvgaq yachàng svng roqgvr shàì wedø íkat wa mánpè Gvray svng vpø shvring we íwe svng Svrabín koqkámpè Francis taq kèní dvkám bøà we íe.