svngkut

Kvt:vm tvmørì taq gvzà vréshìwe svngkut English ku Locust wa tøòwe bvløng pvnò dang svng vgálúnlvm kadø wá shvlawe svng tashì lvm waì.

Ya svngkut pvnrìnø lvngcha taq cvnø àngpvn pvn vlsháshìwe mvtaq tiq shvrà taq kèní dvgá shvràrì kaq gvzà vsvr dø àng mvdo do wa shìnø vlangwe ívl nø vzìng lúnò we íe. Mòngàn yaq svngkut pvn 16 pvn vl we taq Asia móngdànrì vdòng taq nø Migratory locust, Bombay locust, Yellow-spined bamboo locust, Italian locust nvng Tree locust wa nø 6 pvn vkønø kvtvm tvmø bvnlìrì taq gvyaq shìsháòe wae.

Mòngàn FAO taq kèní gún dvtøpmò we taq 2020 nøng June shvlá høq svngkut pvn 500 pvn høq vzìngbøì wa nø gún dvtøpm lúngà we íe. Europe móng nvng Asia móngrì taq yadø íwe svngkut vréshìwe àngkvt kvt vhømìwe íe. Svngkutrì taq kèní mvnuq nvng àngsvprì svng ámò nø gvyaqòwe mvtaq koná vbørì taq gø vkønø vréshìwe íkoná børì shvtin sháòwe íe.

Svngkut vzinwe dang taq svngkut àngmá tigoí nø rvgaq vdòngø àngløm 20 chvng kèní 100 chvng høq àng mvzuq zuq lømòwe í lømnø vkvtshìwe shvràrì taq 10 ni taq kèní 20 ni vdòng górshìwe íe. Zøngnø kwitwe shvràrì taq íni àngnøng køp gø mvgórònø vlsháòe. Górbøò mèpvng bvløncèdø ínø dvgupshì sháòweí àngsvp mvnuqrì vmnø 5-6lvbvn vdòng taq cher yóráìweí svngkut gvbà bønwe íe.

Agám lvm dang Svngkut zønli vkønlong mèpvng wa vgám lvmnø gvzà yakwe ínø shìni mvgórshì dvgvp górshìwe rvtø kèní tvlú vgámwe nø shvlá vtang íe wae. Darì dvgvp vsvngrì taqkèní svngkut dirawe tvràrì taqø gvduk chuqònø we gvtuktaq vjabøwe svngkutrì svng svmií wvŕòwe nvng vbaí vpaqò nø vgámòwe ínigø mvdàm dàm vlangwe svngkutrì svng nø vgám mvlúnò we svng shálúnshìe.

Dèni bvt taqnø svngkutcè shi mvgóròwe dvgvp nvng górshìwe rvtørìtaq we shvràrì taq màònø vpasvng chøkòweí vgámòwe svng yánglúnshìe. Móngdàn tiqmaq taq gvro múngí wàòwe bvløng shvtzì svng àngtøng àngsvprì taq vpvpmòwe ígø svngkut vgámòwe svng yánglúnshìe.

We wa mvtaq svngkut vkønwe shvràrìtaq vlangcarìí la tvp:vmò dø ca rúng shvràrì wáaònø vgámwe nvng ka, kabikrì shvlàngò nøgø vgámòe. Metarhiziumanisophilae wawe bvløng shvtzì vpvpòweí gø vgámlúnshìe. Ínìgø àng dvyø dvthøqnø vgámlúnshìwe tvrà dèni høq wámvlúnò we svng shálún shìe.

Mòngàn FAO taq kèní tvnùò we taq 2020 nøng March nvng June shvlá dvhø Pakistan móngdàn nvng India móngdàn vdòngtaq cvngkut vkøn nø bùmlvm vlwe svng dvtú:vt nàwe ínø vdè Myanmar móngsvng gø tuqsháòwe írvtnø vgámlúm lvm tvlú dvgøshì rawe svng shvdøm bøa we íe.

#မြနာမာ့စွယ်စုံကျမ်း အတွဲ(၂)