Vsvng shvngbe vzømìwe taq kèní làngcha vlíng vpo ráì we dang svng vgámì

Vsvng shvngbe vzømìwe taq kèní làngcha vlíng vpo ráì we dang svng vgámì

Mòngàn móngdàn vràm taq vhømv:mìwe làngcha vlíng vpo nø tiqni mvdàm tiqni rvgaq yachàng vkatshì ráìwenø nà ngà tiq mvdò taq kèní wanø vgám lúnlvm mvlá:mì. 1990 nøng mèpvng Greenhouse gas emissions wawe dat lángshìráì wenø 50% mvdàm luqráì weí téwa rvgaq yachàng tiqni mvdàm tiqni vkatshì ráì we íe.

Wedø íratnø dènøng vdòng taq vsvng shvngbe vzømìweí làngcha shvlá svng roqgvr lúnlvm dvpvt wawe Sustainable development goal (SDG) 13 dang svng gvlshì bøìwe íe. Làngcha vlíng vpo ráìwe taq kèní téwa kvtvm tvmø wa v:mìwe vsvngrì yak lvm vhømìwe mvtaq toniò rvgaq zaqshuprì gvyaq shìráìwe í svngpvn dvcìrì shvngbeí gø yaklvm bvnchvtrì àngpvn pvn vhøm lúngshà.

Dènøng taqnø yadøíwe làngcha vlíng vpo ráìwe svng vgám lvm dvpvt vsvng shvngbe vzømìweí alurìgø gún lvm svng mvdøng walvm tvnùngvtnà we íe.

Yadø íwe dvlàrì svng 1995 nøng mòngàn rvpdoq svngpvn dvcìrì vzøm we lìpùng taqkèní vrashì pvng yàngà we íe wanø shálúnshì we íe.

Svngpvn shvngbe vzømwe mvdòrì nø svngpvn dvcì mvngpòng svng mvdøng gvlwe íe. We døíwe mvdòrìnø ringzi rvgaq svng mvdøng gvlshìwe íratnø làngcha nvng ringzì mvngpòng svng gø shvlawe dang taq kèní tùbum shìwe íe. Wedø íwe mvdò rìsvng mòngàn zìdang ku poqpvngnø wávdu ráì.

The cooperative movement သမဝါယမလှုပ်ရှားမှု wawe svngpvn shvngbe vzømwe bvnlì yalòngnø wulaq bvnlì tiqpvn dvpvt wa mø:í nø vdèmóng vdè rvgaq roqgvr shìwe nvng làngcha svng shvla dø roqgvr shàìwe mvtaq ringzì rvgaq vhánglún lvm dvpat poqpvngshì nø wádvzaq shìráìwe svng shálún shìe.