Zømwàng sharì roqgvr shàì

Vpøì we pèmè nvm chang maq svng pvn dvcìrì nvmlat vl pángshì daqì we rvtø taq kèní nøngmaq vsvngrì nø shayit bvnlì wa we svng shálúnìe.

Chøm taqø nìnàrì roqrim kéì we rvtø shi mvl dvgvp hoq shaq sharit bvnlì nø mvdøng tvmu bvnlì íwe svng yánglúnshìe. Ni vrvm ám:aq lvm dvpvt, góng shiqshàn lvm dvpvt nvng nvngòn kùngàrì vl lvm dvpvt sharit bvnlì taq kèní dvkúm shìwe svng shálúnì e.

Dèni la pvt taqnø nìnà sharì roqrim ám:mì we ínø shayit bvnlì tiqni mvdàm tiqni yúmráì wa lánshì we ínìgø tøng laqyà tiq lòng dø íbøì we shayit bvnlì yanglòng svng tvtut wa we vsvngrì gø gvzà vl we svng yánglúnshìe. Téwa lvngàréì taq cvmlvpvt taq kèní lvpoq lángì nø calong cacøncèrì wapmì we taq nønt lúmnø shvmunshàì we laqyà taq kèní pángshì we íe. Te long dvgvp nø vrá shvnvt, tvli, shahøng, shàm mvtiprì taq kèní shayit bvnlì rì wásháì e. Dèni bvt taq mògàn móngdàn vràm nvng vdè móng rvgaq taq gø móng upkángshú rì taq kèní we dø íwe bvnlì rìsvng vgám lúngà we ínìgø shayit bvnlì yanglòng nø wulaq bvnlì tiqlòng dø nvm:vm we tvmørì taq yánglún shìe. We dø íwe vdòng taq shayitrì nø nønt lúmnø wa we mvdàm jà gvmsùng lún lvm dvpvt wa we lap svng vyuq ráì.

Vdè Myanmar móngdàn òshigong mvløngrì taq cvchè, kàng, kàngzì, poqlvm, vzuq, døí we nìnà sharì benø vmáng lúngì we íe. Jøng jøngni shayit bvnlì wa:vm we vsvngrì taq jà gvmsùng lúnlvm dvpvt wa we ínigø tvrá uqpvdi ívgám we vdòng taq mvyøní nvm:vm we íratnø lún vdu dángte vmyatrì mvlúnònø wángzàpèò vjú dvpvt wa í:vm we svng yánglúnshìe. Vpøì we pèmè vnvm vchang maq vdè móng shìgung mvløng shøng sùngrì nvng zømwàng sharìnø vtang shaq ring nø dvpø shvdún mvlúnshì we íe. Darì vkop vkàng maq bvt taq nø shayit bvnlì wa we íni gø zømwàng sharì taq kèní lúnshì we tvrèrì svng nvm:vm we mvl, vdèò chøm taq gvlònø roqrimò we svng yánglúnshìe.

Mèpvng kaq nø wángzàrì taq kèní zømwàng sha dvrèrì wan:vtnà we íshayit bvnlì svng téwa dvdøt nvt:nà. Shvtnga røng, poqlvm røng, shvwí svkí, shapòr døí we dvrè rìnø wángzàrì dvhøtaq dvpø lúnshì we ínø tiqni mvdàm tiq ni bémvn shìráì. Wedø írat vpøì pèmè vnvm chang maq svngpvn dvci, mvløng shøng sùng nvng zømwang sha nga warì nø tvsvng tùbum kénìnø wa cúnshàì we ínø shvngbe nø vduvbóng dø vlrà we íe.

We dø ílòng taq zømwàng sha, ngarì bémvdaq vmáng mvdaq wa we síng sháì nønt taq kèní zømwàng sharì taq laq mà vréshàì, vdèò móng vdèò rvgaq svng roq gvr shàì wang paqzí dvkøm mvyønge shangbe mvdàm mòngzøl lòng laq tuq daq.

Add new comment

9 + 0 =